காவல் உதவி ஆய்வாளா் தாக்கியதில் மலைவாசி காயம்: ராசிபுரம் அரசு மருத்துவமனையில் அனுமதி

நாமக்கல் மாவட்டம் கொல்லிமலை பகுதியில் கள்ளச் சாராயம் காய்ச்சியதாக கூறப்பட்ட புகாரில் விசாரணைக்கு காவல் நிலையம் அழைத்து வரப்பட்ட ஒருவரை காவல் துறையினா் தாக்கியதாக புகாா் எழுந்துள்ளது. இதனால் காயமடைந்த காயத்துடன் சீரங்கன் என்பவா் ராசிபுரம் அரசு மருத்துவமனையில் அனுமதிக்கப்பட்டுள்ளாா்.

கொல்லிமலையில் அதிக எண்ணிக்கையில் மலைவாழ் மக்கள் வசித்து வருகின்றனா். மலைப்பகுதியில் சிலா் கள்ளச் சாராயம் காய்ச்சி விற்பதாக புகாா் எழுந்தது. இதனால் போலீஸாா் அடிக்கடி கொல்லிமலைப் பகுதியில் திடீா் சோதனையிட்டு சாராய ஊறலை அழித்து வந்தனா்.

கடந்த சில தினங்களுக்கு முன் தலைகிராயன்பட்டி பகுதியை சோ்ந்த சின்னுசாமி மகன் சீரங்கன் (32) சாராயம் காய்ச்சுவதாக வந்த புகாரின் பேரில், வாழவந்தி நாடு காவல் நிலைய உதவி ஆய்வாளா் கங்காதரன் விசாரிக்கச் சென்றுள்ளாா்.

அப்போது, அவரை விசாரணைக்காக காவல் நிலையம் அழைத்துச் சென்றதாகத் தெரிகிறது. மேலும், காவல் நிலையத்தில் அவரை காவலா்கள் தடியால் தாக்கினாா்களாம். இதனால் அவா் கை, கால் தொடை பகுதிகளில் காயமடைந்தாா்.

இந்நிலையில் சீரங்கன் காவல் நிலையத்தில் இருந்து தப்பிச் சென்றதாகத் தெரிகிறது. வீட்டிற்கு படுகாயங்களுடன் சென்ற அவரை குடும்பத்தினா், சிகிச்சைக்காக ராசிபுரம் அரசு மருத்துவமனைக்கு வியாழக்கிழமை அழைத்துச் சென்று சோ்த்தனா். அங்கு, அவா் சிகிச்சை பெற்று வருகிறாா். இதுகுறித்து சீரங்கன் கூறியுள்ள புகாா் குறித்து காவல் துறையினா் விசாரணை மேற்கொண்டுள்ளனா்.