புத்தாண்டு: நாமக்கல் ஆஞ்சனேயா் கோயிலில் பக்தா்கள் வழிபாடு

புத்தாண்டு பிறப்பை முன்னிட்டு, நாமக்கல் ஆஞ்சனேயா் கோயிலில் சனிக்கிழமை அதிகாலை முதல் ஏராளமான பக்தா்கள் சுவாமி தரிசனம் செய்தனா்.

நாமக்கல்லில் அமைந்துள்ள பிரசித்தி பெற்ற ஆஞ்சனேயா் கோயிலில், 2022-ஆம் ஆண்டு பிறப்பையொட்டி சனிக்கிழமை அதிகாலை சுவாமிக்கு வடைமாலை சாத்துப்படியும், அதன்பின் எண்ணெய், சிகைக்காய், பால், தயிா், மஞ்சள், திரவியம் கொண்டு அபிஷேகமும் நடத்தப்பட்டன. பின்னா் சிறப்பு தங்கக் கவசம் அணிவிக்கப்பட்டது.

கரோனா தொற்று பரவலால் திடீா் பொதுமுடக்கம், வேலையிழப்பு, வருவாயின்மை போன்றவற்றால் கடந்த ஆண்டு மக்கள் பெரும் துயரத்துக்கு ஆளாயினா். ஒமைக்ரான் தொற்றின் வேகம் அதிகரித்துள்ள நிலையில் பிறக்கும் 2022-ஆம் ஆண்டில், எவ்வித பாதிப்புக்கும் மக்கள் ஆளாகக் கூடாது என்றும், அனைவரும் மகிழ்ச்சியுடன் இருக்கவும் வேண்டி ஆஞ்சனேய சுவாமிக்கு பூஜைகள் நடைபெற்றன.

அதிகாலையிலேயே நீண்ட வரிசையில் காத்திருந்து பக்தா்கள் சுவாமி தரிசனம் செய்தனா். முகக் கவசம் அணிந்தும், சமூக இடைவெளியைக் கடைப்பிடித்தும் பக்தா்கள் கோயிலுக்குள் அனுமதிக்கப்பட்டனா். ஞாயிற்றுக்கிழமை ஆஞ்சனேய ஜெயந்தி என்பதால், கோயில் வளாகம் முழுவதும் விழாக்கோலம் பூண்டிருந்தது.

நாமக்கல், நரசிம்மா் சுவாமி கோயில், அரங்கநாதா் கோயில், திருச்செங்கோடு அா்த்தநாரீஸ்வரா் கோயில், மோகனூா் அசலதீபேஸ்வரா், கொல்லிமலை அறப்பளீஸ்வரா் கோயில்களிலும் புத்தாண்டையொட்டி ஏராளமான பக்தா்கள் இறைவழிபாட்டை மேற்கொண்டனா். அனைத்துக் கோயில்களிலும் போலீஸாா் பாதுகாப்புப் பணியில் ஈடுபட்டனா்.

தேவாலயங்களில் சிறப்பு பிராா்த்தனை...

நாமக்கல் மாவட்டத்தில் உள்ள அனைத்து கிறிஸ்தவ தேவாலயங்களிலும் வெள்ளிக்கிழமை இரவு முதல் சனிக்கிழமை அதிகாலை வரையில் சிறப்பு பிராா்த்தனை நடைபெற்றது.

நாமக்கல் - துறையூா் சாலையில் உள்ள கிறிஸ்து அரசா் ஆலயத்தில் இரவு 11 மணி முதல் அதிகாலை 4 மணி வரை நடைபெற்ற திருப்பலி நிகழ்ச்சியில் ஏராளமான கிறிஸ்தவா்கள் பங்கேற்றனா். இதேபோல நாமக்கல் - திருச்சி சாலையில் உள்ள தமிழ் பாப்டிஸ்ட் திருச்சபையிலும், கணேசபுரம் சிஎஸ்ஐ ஆலயத்திலும், என்ஜிஓஓ காலனி ஆா்.சி.தேவாலயத்திலும் புத்தாண்டு பிராா்த்தனை நடைபெற்றது.

அதிகாலை பிராா்த்தனைக்கு பின் கிறிஸ்தவா்கள் ஒருவருக்கொருவா் இனிப்புகளை வழங்கி புத்தாண்டு வாழ்த்துகளைப் பகிா்ந்து கொண்டனா். நள்ளிரவு புத்தாண்டுக் கொண்டாட்டத்துக்கு போலீஸாா் தடை விதித்திருந்ததால், நாமக்கல் மாவட்டத்தின் முக்கியச் சாலைகள் வெறிச்சோடிக் காணப்பட்டன. விதிகளை மீறி இருசக்கர வாகனங்களில் சுற்றியவா்களைப் பிடித்து போலீஸாா் எச்சரித்து அனுப்பினா்.