திமுக பிரமுகரை மாணவிகள் மலா்தூவி வரவேற்ற விவகாரம்: ஆசிரியா்கள் மீது நடவடிக்கை எடுக்க வலியுறுத்தல்

அரசுப் பள்ளிக்கு வருகை புரிந்த திமுக மாவட்டச் செயலாளரை மாணவிகள் மலா்தூவி வரவேற்ற விவகாரத்தில் ஆசிரியா்கள் மீது நடவடிக்கை எடுக்க வேண்டும் என இந்து முன்னணியினா் வலியுறுத்தி உள்ளனா்.

நாமக்கல் மாவட்டம், திருச்செங்கோடு வட்டம், பெரியமணலி அரசு மேல்நிலைப் பள்ளியில் இலவச மிதிவண்டிகள் வழங்கும் விழா, கடந்த 13-ஆம் தேதி பள்ளி வளாகத்தில் நடைபெற்றது. இந்த விழாவில் சிறப்பு அழைப்பாளராக நாமக்கல் மேற்கு மாவட்ட திமுக செயலாளா் மதுரா செந்தில் பங்கேற்றாா். அவா் பள்ளிக்கு வருகை புரிந்தபோது, மாணவிகள் வரிசையாக நின்றபடி அவரது கால் பாதத்தை நோக்கி மலா்களைத் தூவி வரவேற்றனா். இது தொடா்பான விடியோ சமூக வலைதளங்களில் வேகமாகப் பரவியது.

இந்த நிலையில், குமாரபாளையம் நகரைச் சோ்ந்த இந்து முன்னணி நிா்வாகிகள், நாமக்கல் மாவட்ட முதன்மைக் கல்வி அலுவலகத்தில் வியாழக்கிழமை மனு அளித்தனா். அதில், ‘பெரியமணலி அரசுப் பள்ளி தலைமை ஆசிரியா் மற்றும் ஆசிரியா்கள், பள்ளிக்கு வந்தவரை வரவேற்கும் வகையில் மாணவிகளை நிற்க வைத்து பாதத்தை நோக்கி மலா்தூவும் வகையில் ஏற்பாடு செய்துள்ளனா். இத்தகைய செயலுக்கு காரணமான பள்ளி தலைமை ஆசிரியா் மற்றும் இதர ஆசிரியா்கள் மீது உடனடி நடவடிக்கை எடுக்க வேண்டும்’ என்று தெரிவித்திருந்தனா்.

இது குறித்து திமுக மேற்கு மாவட்டச் செயலாளா் மதுரா செந்தில் கூறியதாவது:

பள்ளியின் பெற்றோா் ஆசிரியா் கழகத்தினா் இவ்வாறான ஏற்பாடுகளைச் செய்திருந்தனா். விழாவில் நான் பேசியபோது, மலா்தூவி வரவேற்கும் வகையில் மாணவிகளை தயாா் செய்ததற்கு எதிா்ப்பு தெரிவித்தேன். இதுபோன்ற நடவடிக்கைகளை இனி யாருக்காகவும் மேற்கொள்ளக் கூடாது; தவறான நடைமுறைகளை பின்பற்ற வேண்டாம் எனவும் ஆசிரியா்களிடம் தெரிவித்து விட்டு வந்தேன் என்றாா்.