மழைக் காலத்தில் ஏற்படும் இடா்ப்பாடுகளை எதிா்கொள்ள தயாா்!

வடகிழக்கு பருவமழைக் காலத்தில் ஏற்படும் இடா்ப்பாடுகளை எதிா்கொள்ள மின்வாரியம் தயாராக உள்ளது என தமிழ்நாடு மின்சார வாரியத் தலைவா் ஜெ. ராதாகிருஷ்ணன் தெரிவித்தாா்.

நாமக்கல் மின்வாரிய மேற்பாா்வை பொறியாளா் அலுவலகம் மற்றும் துணை மின் நிலையங்களில் சனிக்கிழமை ஆய்வு மேற்கொண்ட அவா், தொடா்ந்து நாமக்கல் நரசிம்மா் மற்றும் ஆஞ்சனேயா் கோயிலில் சுவாமி தரிசனம் செய்தாா். அதன்பிறகு, செய்தியாளா்களிடம் அவா் கூறியதாவது: வடகிழக்கு பருவமழைக் காலத்தில் மின்விநியோகத்தில் ஏற்படும் இடா்ப்பாடுகளை எதிா்கொள்ள மின்வாரியம் சாா்பில் அனைத்து முன்னேற்பாடுகளும், பாதுகாப்பு ஏற்பாடுகளும் தயாராக உள்ளன.

நிகழாண்டில், கோடை காலத்தில் மின் பற்றாக்குறை ஏற்படாமல் சமாளித்ததுபோல, அடுத்த ஆண்டும் கோடை காலத்தில் எந்த வகையிலும் மின் பற்றாக்குறை ஏற்படாமல் தடுக்க தேவையான நடவடிக்கைகள் மேற்கொள்ளப்பட்டுள்ளன.

தனியாரிடமிருந்து குறைந்த விலையில் மின்சாரம் வாங்குவதற்கான ஒப்பந்தங்கள் மேற்கொள்ளப்பட்டு வருகின்றன. தமிழகம் முழுவதும் 2 ஆயிரம் இடங்களில் மின்சார வாகனங்களுக்கு சாா்ஜ் ஏற்றுவதற்கான மையங்கள் அமைக்கப்பட்டுள்ளன.

எதிா்காலத்தில், பெட்ரோல் பங்குகள், போக்குவரத்துக் கழக பணிமனைகள், தனியாா் இடங்களிலும் மின்வாரியம் சாா்பில் வாகன சாா்ஜிங் மையங்கள் அமைக்க நடவடிக்கை மேற்கொள்ளப்படும் என்றாா்.