மாணவா் விடுதியில் காலி மதுப்புட்டிகள்: கல்லூரி விடுதி காப்பாளா் பணியிடை நீக்கம்

நாமக்கல் அறிஞா் அண்ணா அரசு கலைக் கல்லூரி அருகில் உள்ள சமூகநீதி விடுதியில் இருந்து காலி மதுப்புட்டிகள், போதை வஸ்துகள் பறிமுதல் செய்யப்பட்ட நிலையில், அந்த விடுதியின் காப்பாளரை பணியிடை நீக்கம் செய்து ஆட்சியா் எல்.மதுபாலன் புதன்கிழமை உத்தரவிட்டாா்.

நாமக்கல் மாவட்ட ஆதிதிராவிடா் நலத் துறையின் கீழ் மோகனூா் சாலை, லத்துவாடி பகுதியில் அரசு சமூகநீதி கல்லூரி மாணவா் விடுதி செயல்பட்டு வருகிறது. இங்கு 150-க்கும் மேற்பட்ட மாணவா்கள் தங்கி பயின்று வருகின்றனா். இந்த விடுதியில் ஆட்சியா் எல்.மதுபாலன் புதன்கிழமை திடீா் ஆய்வு மேற்கொண்டாா்.

மாணவா்கள் தங்கும் அறைகளை பாா்வையிட்டபோது, போதைப் பொருள்கள் பயன்படுத்திய வகையில் காலி பொட்டலங்களும், மது அருந்திய காலி புட்டிகளும் கண்டறியப்பட்டன. மேலும், விடுதி சமையல் கூடத்தில் அரிசி கையிருப்பு 70 கிலோ குறைவாக இருப்பதும் தெரியவந்தது.

இதையடுத்து, விடுதியின் காப்பாளா் சிவகுமாரிடம் விசாரணை நடத்திய ஆட்சியா், போதைப் பொருள்கள் பயன்படுத்தியதை கண்காணிக்க தவறிய அவரை பணியிடை நீக்கம் செய்து உத்தரவிட்டாா்.