செப். 9 முதல் முதல்வா் கோப்பை விளையாட்டுப் போட்டி: நாமக்கல்லில் 1.16 லட்சம் போ் பதிவு

முதல்வா் கோப்பைக்கான விளையாட்டுப் போட்டிகளில் பங்கேற்க நாமக்கல் மாவட்டத்தில் 1,16,725 வீரா், வீராங்கனைகள் பதிவு செய்துள்ளனா். மாவட்ட அளவிலான போட்டிகள் செப். 9 முதல் 21-ஆம் தேதி வரை ஆறு இடங்களில் நடைபெற உள்ளன.

ஒவ்வோா் ஆண்டும் முதல்வா் கோப்பைக்கான விளையாட்டுப் போட்டிகள் மாவட்ட, மண்டல, மாநில அளவில் நடத்தப்பட்டு வருகின்றன. இதில் பங்கேற்க விரும்புவோா் ஆக.31-ஆம் தேதி வரையில் தமிழ்நாடு விளையாட்டு மேம்பாட்டு ஆணைய இணையதளத்தில் உரிய ஆவணங்களுடன் பதிவு செய்யலாம் என கடந்த மாதம் 17-ஆம் தேதி அறிவிக்கப்பட்டிருந்தது.

இதுவரை 38 வகையான விளையாட்டுப் போட்டிகள் நடத்தப்பட்ட நிலையில், நிகழாண்டு முதல் வில்வித்தை, வுஷூ, துப்பாக்கிச் சுடுதல், யோகா, மல்லா் கம்பம், ஸ்பீடு ஸ்கேட்டிங், நீா் விளையாட்டுகளான கயாக்யிங், கேனோயிங் உள்ளிட்ட புதிய விளையாட்டுகள் சோ்க்கப்பட்டுள்ளன. இதன்மூலம் மொத்தம் 45 வகையான விளையாட்டுப் போட்டிகள் ஒரு மாதம் வரையில் நடைபெற உள்ளன.

விளையாட்டு வீரா், வீராங்கனைகள், அரசுத் துறை ஊழியா்கள், மாற்றுத்திறனாளிகள், பொதுமக்கள் என பல்வேறு தரப்பினரும் ஆா்வமுடன் முதல்வா் கோப்பை போட்டிகளில் பங்கேற்க விண்ணப்பித்துள்ளனா்.

மாவட்ட வாரியாகப் பாா்க்கும்போது திருவண்ணாமலை மாவட்டம் 1,61,972 பேருடன் முதலிடத்திலும், கோவை மாவட்டம் 1,32,715 பேருடன் இரண்டாமிடத்திலும், நாமக்கல் மாவட்டம் 1,16,725 பேருடன் மூன்றாமிடத்திலும் உள்ளன. சேலம் மாவட்டம் 95,954 பேருடன் ஏழாவது இடத்திலும், கிருஷ்ணகிரி மாவட்டம் 65,280 பேருடன் பதிமூன்றாம் இடத்திலும், தருமபுரி மாவட்டம் 55,743 பேருடன் இருபதாவது இடத்திலும் உள்ளன. மொத்தம் உள்ள 38 மாவட்டங்களில் நீலகிரி 15,437 பேருடன் கடைசி இடத்தில் உள்ளது.

முதல்வா் கோப்பைக்கான மாவட்ட விளையாட்டுப் போட்டிகளில் பங்கேற்க பள்ளி மாணவ, மாணவிகள் 13,72,866 பேரும், கல்லூரி மாணவா்கள் 4,99,892 பேரும், மாற்றுத்திறனாளிகள் 34,110 பேரும், அரசுத் துறை ஊழியா்கள் 62,301 பேரும், பொதுமக்கள் 4,87,843 பேரும் என மொத்தம் 24,56,713 போ் விண்ணப்பித்துள்ளனா்.

6 இடங்களில் போட்டிகள்

நாமக்கல் மாவட்டத்தில் செப். 9 முதல் 21-ஆம் தேதி வரையில் நான்கு பிரிவுகளாக மாவட்ட விளையாட்டு அரங்கம், திருச்செங்கோடு கே.எஸ்.ஆா். பொறியியல் கல்லூரி, நாமக்கல் விக்டோரியா அரங்கம், நாமக்கல் ஸ்பைரோ பிரைம் பப்ளிக் பள்ளி, கிளாசிக் பள்ளி, பாவை பாச்சல் பொறியியல் கல்லூரி ஆகிய மொத்தம் 6 இடங்களில் பல்வேறு வகையான போட்டிகள் நடைபெற உள்ளன.