பூலாம்பட்டி கதவணையில் பழுதடைந்த ஷட்டர்களை விரைவாக சீரமைக்க விவசாயிகள் கோரிக்கை

பூலாம்பட்டி பகுதியில் காவிரி ஆற்றின் குறுக்கே கட்டப்பட்டுள்ள நெரிஞ்சிப்பேட்டை கதவணையில் பழுதான ஷட்டர்களை விரைவாக சீரமைத்திட வேண்டும் என அப்பகுதி விவசாயிகள் கோரிக்கை விடுத்துள்ளனர். 
மேட்டூர் அணையிலிருந்து திறக்கப்படும் தண்ணீரை தேக்கும் வகையில்,  செக்கானூர்,  பூலாம்பட்டி அருகில் உள்ள நெரிஞ்சிப்பேட்டை, கோனேரிப்பட்டி , ஊராட்சிக்கோட்டை உள்ளிட்ட இடங்களில் கதவணைகள் 
அமைக்கப்பட்டு  நீரினை தேக்கி மின்உற்பத்தி செய்யும் பணி நடைபெற்று வருகிறது. மின் உற்பத்திக்காக இக்கதவணைகளில் தேக்கப்படும் நீரினால்  அப்பகுதியில் உள்ள ஆயிரக்கணக்கான ஏக்கர் விளைநிலங்கள் பாசன வசதி பெற்று வருகின்றன.
 இந்த நிலையில் பூலாம்பட்டி - நெரிஞ்சிப்பேட்டை பகுதிகளை இணைக்கும் வகையில், காவிரி ஆற்றின் குறுக்கே கட்டப்பட்டுள்ள கதவணையின் ஷட்டர்களில் (மதகுகளில்), கடந்த டிசம்பர் மாதம் திடீர் என நீர்க் கசிவு ஏற்பட்டது. தொடர்ந்து நீர்க் கசிவு அதிகரித்து வந்த நிலையில்,  ஷட்டர் எண் 13 மற்றும் 7  பராமரிப்புப் பணிக்காக 
திறக்கப்பட்டது. இதனால் கதவணையிலிருந்து அதிகப்படியான தண்ணீர் வெளியேறியதால், அணையின் நீர்ப் பிடிப்பு பகுதிகளில் நீர்மட்டம் உள்வாங்கியது. 
இதனையடுத்து பூலாம்பட்டி, கூடக்கல், குப்பனூர், மேலப்பாறை உள்ளிட்ட பகுதிகளில் நிலத்தடி நீர்மட்டம் வெகுவாகக் குறைந்து போனது.  இப்பகுதியில் வழக்கமாக நடைபெற்று வந்த விவசாயப் பணிகள் பாதிப்படைந்ததாக  அப்பகுதி விவசாயிகள் தெரிவித்தனர்.  மேலும் 
தற்போது காவிரியில் கூடுதலான வெள்ளப்பெருக்கு ஏற்பட்டுள்ள நிலையில்,  கதவணையின் அனைத்து ஷட்டர்களும் திறக்கப்பட்டுள்ள இந்த சந்தர்ப்பத்தை பயன்படுத்தி சம்பந்தப்பட்ட அலுவலர்கள் பழுதான ஷட்டர்களை ஆய்வு செய்து  சீரமைத்திட வேண்டும் எனவும்,  தற்போது காவிரியில் திறக்கப்பட்டுள்ள உபரி நீரினை தேக்கிட இது ஒரு வாய்ப்பாக அமையும் எனவும் இப்பகுதி விவசாயிகள் வேண்டுகோள் விடுத்துள்ளனர்.