வாக்காளர் விழிப்புணர்வு மன்றம் துவக்கம்

வாக்காளர் விழிப்புணர்வு மன்றத் துவக்க விழாவில் தேர்தல் ஆணையத்தால் வெளியிடப்பட்டுள்ள வாக்காளர் விழிப்புணர்வு மன்ற சின்னத்தை மாவட்ட தேர்தல் அலுவலரும், ஆட்சியருமான ரோகிணி ராம்தாஸ் வெளியிட்டார்.
சேலம் மாவட்ட ஆட்சியர் அலுவலக கூட்டரங்கில் வாக்காளர் விழிப்புணர்வு மன்றத் துவக்க விழாவில் ஆட்சியர் ரோகிணி ராம்தாஸ் பேசியது:
இந்தியத் தேர்தல் ஆணையத்தின் உத்தரவின்படி வாக்காளர் விழிப்புணர்வு மன்றம் துவக்கப்பட்டுள்ளது. வாக்களிப்பதன் முக்கியத்துவம் குறித்து வாக்காளர்களிடையே விழிப்புணர்வு ஏற்படுத்துவதற்காக இந்திய தேர்தல் ஆணையம் பல்வேறு நடவடிக்கைகளை எடுத்து வருகிறது. 
அதன் ஒரு பகுதியாக அரசுத் துறை, பொதுத் துறை, தனியார் துறை அலுவலகங்களில் வாக்காளர் விழிப்புணர்வு மன்றம் அமைக்க வேண்டும் என்று தெரிவித்துள்ளது.
வாக்காளர் விழிப்புணர்வு மன்றத்தில் சம்பந்தப்பட்ட அலுவலகத்தில் பணிபுரியும் அனைவரையும் உறுப்பினர்களாகச் சேர்க்க வேண்டும். 
அந்த அலுவலகத்தில் பணிபுரியும் நபர்களின் தேர்தல் சம்பந்தமான அனுபவம் உடையவரை பொறுப்பாளராக நியமிக்க வேண்டும்.
அந்த நபர் மாவட்டத் தேர்தல் அலுவலகம் ஒருங்கிணைந்து செயல்பட வேண்டும். சம்பந்தப்பட்ட பொறுப்பாளர் தேர்தல் தொடர்பாக வாக்களிப்பதன் அவசியம், நேர்மையாக வாக்களிப்பது, வாக்குப் பதிவு இயந்திரம் யாருக்கு வாக்களித்தோம் என காட்டும் கருவி ஆகியவை ஏற்படுத்த வேண்டும். 
வாக்காளர் பதிவு, வாக்களிக்கும் முறை பற்றிய அறிவை பொது மக்களுக்கு புகட்டுவது,  வாக்குப்பதிவு இயந்திரத்தை பற்றி விளக்கி கூறுதல், தங்கள் வாக்கினுடைய மதிப்பு, வாக்களிப்பதன் முக்கியத்துவம் போன்றவற்றை அழைக்கப்பட்டவர்களுக்கு எடுத்துரைத்தல் போன்றவை  இம்மன்றத்தின் நேக்கமாகும்.
இம்மன்றத்தில் 14 முதல் 17 வயதுக்கு உட்பட்ட எதிர்கால வாக்காளர்கள், 18 முதல் 19 வயது நிரப்பிய வாக்காளர்கள், நடுத்தர மற்றும் இளம் வயதுள்ள பெண் வாக்காளர்கள், முதிர் வயதடைந்த வாக்காளர்கள் ஆகியோர் பங்கேற்பார்கள் என்றார்.
முன்னதாக வாக்காளர் விழிப்புணர்வு மன்ற சின்னத்தினை ஆட்சியர் வெளியிட்டார்.
நிகழ்ச்சியில் மாவட்ட ஊரக வளர்ச்சி முகமை திட்ட இயக்குநர் நா.அருள்ஜோதி அரசன், கூட்டுறவு சங்கங்களின் இணைப்பதிவாளர் கோ.ராஜேந்திர பிரசாத், ஆவின் பொது மேலாளர் குமரேஷ்வரன், மாநில தேர்தல் விழிப்புணர்வு பயிற்றுனர் ரேணுகா ஆலிவர் உள்ளிட்ட அலுவலர்கள் கலந்து கொண்டனர்.