அத்தியாவசியப் பொருள்கள் மக்களுக்கு தரமாக வழங்கப்படுவதை உறுதி செய்ய வேண்டும்

பொதுமக்களுக்குத் தேவையான அத்தியாவசியப் பொருள்கள் தரமாக வழங்கப்படுவதை துறை அலுவலா்கள் உறுதி செய்ய வேண்டும் என மாவட்ட ஆட்சியா் ரா.பிருந்தாதேவி அறிவுறுத்தியுள்ளாா்.

சேலம் மாவட்டத்தில் பொது விநியோகத் திட்ட செயல்பாடுகள் குறித்த கண்காணிப்புக்குழு கூட்டம் மாவட்ட ஆட்சியா் ரா.பிருந்தாதேவி தலைமையில் வியாழக்கிழமை நடைபெற்றது. மக்களவை உறுப்பினா்கள் டி.எம்.செல்வகணபதி (சேலம்), தே.மலையரசன் (கள்ளக்குறிச்சி), மாதேஸ்வரன் (நாமக்கல்) ஆகியோா் முன்னிலையில் நடைபெற்ற கூட்டத்தில் மாவட்ட ஆட்சியா் தெரிவித்ததாவது:

மாவட்ட ஆட்சியரைத் தலைவராகவும், மக்களவை உறுப்பினா்களை உறுப்பினா்களாகவும் கொண்டுள்ள இந்தக் குழு, மூன்று மாதங்களுக்கு ஒருமுறை கூடி பொது விநியோகத் திட்ட செயல்பாடுகள் குறித்து முழுமையாக ஆய்வு மேற்கொள்கிறது.

சேலம் மாவட்டத்தைப் பொருத்தவரை 1,264 முழு நேரம் மற்றும் 473 பகுதி நேரம் நியாயவிலைக் கடைகள் என மொத்தம் 1,737 நியாயவிலைக் கடைகளும், 112 நகரும் நியாயவிலைக் கடைகளும் செயல்பட்டு வருகின்றன. சேலம் மாவட்டத்தில் 9,64,626 அரிசி குடும்ப அட்டைகள், 24,726 சா்க்கரை விருப்ப அட்டைகள், 3,185 காவலா் அட்டைகள், 1,866 எப்பொருளும் வேண்டாத அட்டைகள் உள்ளிட்ட 11,02,827 குடும்ப அட்டைதாா்களுக்கு நியாயவிலைக் கடைகள் மூலம் அரிசி, சா்க்கரை, கோதுமை, துவரம் பருப்பு, பாமாயில் உள்ளிட்ட அத்தியாவசியப் பொருள்கள் வழங்கப்பட்டு வருகின்றன.

குறிப்பாக, கோதுமை, சா்க்கரை ஆகியவை மாதம் ஒன்றுக்கு 1,000 மெ.டன் வரை இருப்பு வைத்துக்கொள்ள அனுமதிக்கப்பட்டுள்ளது. கூட்டுறவுத் துறையின் சாா்பில் 250 நியாயவிலைக் கடைகள் நவீனமயமாக்கப்பட்டுள்ளன. இக்கூட்டத்தில் பொதுமக்களுக்குத் தேவையான அத்தியாவசியப் பொருள்கள் தரமாக வழங்கப்படுவதை துறை அலுவலா்கள் உறுதி செய்திட வேண்டுமென அறிவுறுத்தப்பட்டுள்ளதாகக் கூறினாா்.

இக்கூட்டத்தில், மாவட்ட வருவாய் அலுவலா் மரு.பெ.மேனகா, மேட்டூா் சாா் ஆட்சியா் நே.பொன்மணி, இ.ஆ.ப., உதவி ஆட்சியா் (பயிற்சி) ஆக்ரிதி சேத்தி, கூட்டுறவுச் சங்கங்களின் இணைப் பதிவாளா் ப.ரவிக்குமாா், கோட்டாட்சியா்கள் அபிநயா, லோகநாயகி, உள்ளிட்ட அலுவலா்கள் கலந்துகொண்டனா்.