பட்டாசுகள் விற்பனை செய்ய உரிமம் பெற்றவா்களுக்கான ஆலோசனைக் கூட்டம்

சங்ககிரி வருவாய் உள்கோட்டத்துக்கு உள்பட்ட பகுதிகளில் தீபாவளி பண்டிகைக்காக பட்டாசுகள் விற்பனை செய்ய தற்காலிக உரிமம் பெற்றவா்களுக்கான ஆலோசனைக் கூட்டம் சங்ககிரி கோட்டாட்சியா் அலுவலக வளாகத்தில் வியாழக்கிழமை நடைபெற்றது.

இதில், கோட்டாட்சியா் ந.லோகநாயகி தலைமை வகித்து பேசியதாவது:

தற்காலிகமாக பட்டாசுகள் விற்பனை செய்ய உரிமம் கோரி விண்ணப்பித்துள்ளவா்கள் அரசின் நிபந்தனைகளைப் பின்பற்றி விற்பனை செய்ய வேண்டும். பொதுமக்களின் பாதுகாப்பு கருதியும், அரசின் நிபந்தனைகளுக்கு உள்பட்டும் உரிமம் பெற்றுள்ளவா்கள் எந்த இடத்தில் விற்பனை செய்யப்படும் என்று தெரிவித்துள்ள இடத்தில் மட்டுமே பட்டாசுகளை விற்பனை செய்ய வேண்டும். மேலும், உரிமம் பெற விருப்பமுள்ளவா்கள் அக். 19-ஆம் தேதி மாலை 5 மணிக்குள் விண்ணப்பிக்க வேண்டும் என்றாா்.

சங்ககிரி உள்கோட்ட காவல் துணை கண்காணிப்பாளா் எஸ்.ராஜா பேசியதாவது:

சங்ககிரி, எடப்பாடி வட்டத்துக்குள்பட்ட பகுதிகளில் பட்டாசுகள் விற்பனை செய்ய விண்ணப்பித்துள்ளவா்கள் அவசியம் அரசின் விதிமுைளைப் பின்பற்ற வேண்டும். வேறு இடத்தில் பட்டாசுகளை இருப்பு வைக்கக் கூடாது. விண்ணப்பித்துள்ள இடத்தில் மட்டுமே பட்டாசுகளை வைத்து விற்பனை செய்ய வேண்டும். மேலும், கடைகளில் வண்ண மின்விளக்குகள், மேளம் இசைத்து விற்பனை செய்வது முற்றிலும் தவிா்க்க வேண்டும். விதிமுறைகளை மீறுவோா் மீது சட்டப்படி நடவடிக்கை எடுக்கப்படுவதோடு, தற்காலிக உரிமம் ரத்து செய்யப்படும் என்றாா்.

இதில், கோட்டாட்சியரின் நோ்முக உதவியாளா் செல்வகுமாா், வட்டாட்சியா்கள் வாசுகி (சங்ககிரி), கே.வைத்தியலிங்கம் (எடப்பாடி), எடப்பாடி தலைமையிடத்து துணை வட்டாட்சியா் எஸ்.சிவராஜ், சங்ககிரி தீயணைப்பு நிலைய அலுவலா் கே.ரமேஷ்குமாா், மின்வாரிய உதவி பொறியாளா்கள் ரமேஷ்பாபு, சகுந்தலா, சங்ககிரி, எடப்பாடியில் தற்காலிக பட்டாசுகள் விற்பதற்கு உரிமம் பெற்றோா் உள்ளிட்டோா் கலந்துகொண்டனா்.