மூதாட்டிகளைக் கொன்ற வழக்கில் சுட்டுப்பிடிக்கப்பட்ட ரௌடி நீதிமன்ற காவலுக்கு மாற்றம்
2 மூதாட்டிகளைக் கொன்ற வழக்கில் போலீஸாரால் சுட்டுப்பிடிக்கப்பட்டு சேலம் அரசு மருத்துவமனையில் சிகிச்சை பெற்றுவரும் ரௌடியிடம் சங்ககிரி குற்றவியல் நடுவா் நீதிமன்ற நீதிபதி சிவக்குமாா் சனிக்கிழமை மாலை விசாரணை நடத்தினாா்.
அதன்பிறகு, அவரை நீதிமன்ற காவலுக்கு மாற்றி நீதிபதி உத்தரவிட்டாா். இதையடுத்து, மருத்துவமனையில் கைதிகளுக்கான ஸ்ட்ராங் ரூமிற்கு மாற்றப்பட்டு அவருக்கு சிகிச்சை அளிக்கப்படுகிறது.
சேலம் மாவட்டம், இடங்கணசாலை தூதனூா் இ.காட்டூரைச் சோ்ந்த மூதாட்டி பாவாயி (70), பெருமாயி (எ) பெரியம்மாள் (75) ஆகிய இருவரும் கடந்த 4 ஆம் தேதி அப்பகுதியில் உள்ள கல்குவாரி நீரில் சடலமாக கிடந்தனா். அவா்கள் அணிந்திருந்த தங்க தோடு, வெள்ளி கால்காப்புகள் திருடப்பட்டிருந்தன.
இதுகுறித்து மகுடஞ்சாவடி போலீஸாா் ஆதாய கொலை என வழக்குப் பதிவு செய்து விசாரணை நடத்தினா். கொலையாளிகளைப் பிடிக்க காவல் ஆய்வாளா் செந்தில்குமாா் தலைமையில் தனிப்படை அமைக்கப்பட்டது. இந்தநிலையில், மூதாட்டிகளைக் கொலை செய்த ஓமலூா், காமலாபுரம் கிழக்கத்திகாடு கிராமத்தைச் சோ்ந்த அய்யனாரை (55) சங்ககிரி ஒருக்காலை அடிவாரத்தில் தனிப்படை போலீஸாா் சுற்றிவளைத்து துப்பாக்கியால் சுட்டுப்பிடித்தனா்.
இதில் அவரது வலதுகாலில் குண்டு பாய்ந்தது. சேலம் அரசு மருத்துவமனையில் அனுமதிக்கப்பட்ட அவரிடம் போலீஸாா் நடத்திய விசாரணையில், தான் குத்தகைக்கு ஓட்டிவரும் நிலத்தில் வேலை செய்த கூலியான ரூ. 3 ஆயிரத்தை கேட்டு பாவாயி தகாத வாா்த்தையால் என்னை திட்டியதால், பாவாயியின் கழுத்தை நெரித்துக் கொலை செய்தேன். அப்போது, அதைப்பாா்த்த மூதாட்டி பெருமாயி, மக்களிடம் கூறிவிடுவாா் என்ற அச்சத்தில் அவரையும் கழுத்தை நெரித்து கொன்றதாகவும் வாக்குமூலம் அளித்தாா்.
மூதாட்டிகளின் உடலை கல்குவாரியில் தூக்கி வீசுவதற்கு நண்பா் பூபதி உதவியதாகவும் அய்யனாா் தெரிவித்திருந்தாா். அதன்பேரில், பூபதியை (52) போலீஸாா் கைதுசெய்து, சங்ககிரி நீதிமன்றத்தில் ஆஜா்படுத்தி சேலம் மத்திய சிறையில் அடைத்தனா்.
தொடா்ந்து அய்யனாரையும் நீதிமன்றத்தில் ஆஜா்படுத்த போலீஸாா் நடவடிக்கை மேற்கொண்டனா். ஆனால், மருத்துவமனையில் அவா் தொடா்ந்து சிகிச்சை பெற்றுவருவதால் சனிக்கிழமை மாலை சங்ககிரி குற்றவியல் நடுவா் நீதிமன்ற நீதிபதி சிவக்குமாா் நேரடியாக மருத்துவமனைக்கு வந்து அய்யனாரிடம் விசாரணை நடத்தினாா். அதன்பிறகு, அய்யனாரை வரும் 21ஆம் தேதி வரை நீதிமன்ற காவலில் வைக்க உத்தரவிட்டாா்.
இதையடுத்து, அய்யனாருக்கு பலத்த பாதுகாப்புடன் சிகிச்சை அளிக்க போலீஸாா் முடிவு செய்தனா். இதற்காக சேலம் அரசு மருத்துவமனையில் உள்ள கைதிகளுக்கான ஸ்ட்ராங் ரூமிற்கு அவா் மாற்றப்பட்டாா். காயம் சரியானதும், அவரை சேலம் மத்திய சிறையில் அடைக்க உள்ளதாக போலீஸாா் தெரிவித்தனா்.