அண்ணா பல்கலை. மண்டல அளவிலான கூடைப் பந்துப் போட்டிகள்

அண்ணா பல்கலைக் கழக மண்டல (17) கூடைப் பந்தாட்டப் போட்டியில் திண்டுக்கல் பிஎஸ்என்ஏ கல்லூரி அணி முதலிடம் பெற்று, பல்கலைக் கழக மண்டலங்களுக்கு இடையிலான போட்டிக்கு புதன்கிழமை தகுதிப் பெற்றது.
 இதில் பெண்களுக்கான கூடைப் பந்துப் போட்டிகள், திண்டுக்கல் எஸ்எஸ்எம் பொறியியல் கல்லூரியில் புதன்கிழமை நடைபெற்றன. கரூர், திண்டுக்கல், தேனி, விருதுநகர் மாவட்டங்களைச் சேர்ந்த 8 அணிகள் இப்போட்டியில் கலந்து கொண்டன. 
 திண்டுக்கல் பிஎஸ்என்ஏ கல்லூரி அணியும், எஸ்எஸ்எம் கல்லூரி அணியும் இறுதி ஆட்டத்துக்குத் தகுதிப் பெற்றன. இதில், 31-16 என்ற புள்ளிகள் கணக்கில் பிஎஸ்என்ஏ கல்லூரி முதலிடம் பிடித்தது. 3ஆவது இடத்துக்கான போட்டியில் கரூர் குமாரசாமி கல்லூரியும், செட்டிநாடு பொறியியல் கல்லூரியும் மோதின. இதில், 17-12 என்ற புள்ளிகள் அடிப்படையில் கரூர் குமாரசாமி பொறியியல் கல்லூரி அணி 3ஆம் இடம் பிடித்தது.
 முதலிடம் பெற்ற பிஎஸ்என்ஏ கல்லூரி அணி, அண்ணா பல்கலைக் கழக மண்டலங்களுக்கு இடையிலான போட்டிக்கு தகுதிப் பெற்றது.