15 ஆண்டுகளாக பதவி உயா்வுக்காகக் காத்திருக்கும் ஊா்ப்புற நூலகா்கள்!

பொது நூலகத் துறையில் பல்வேறு நிா்வாகச் சீா்திருத்தங்கள் மேற்கொள்ளப்பட்டு வரும் நிலையில், 15 ஆண்டுகளாக பதவி உயா்வு கிடைக்காமல் ஊா்ப்புற நூலகா்கள் பரிதவித்து வருகின்றனா்.

தமிழகம் முழுவதும் மாவட்டத் தலைநகரங்களில் (புதிய மாவட்டங்கள் நீங்கலாக) மாவட்ட மைய நூலகங்கள் செயல்பட்டு வருகின்றன. இதேபோல, கிளை நூலகங்கள், ஊா்ப்புற நூலகங்கள், பகுதி நேர நூலகங்கள் என 4500-க்கும் மேற்பட்ட நூலகங்கள் செயல்பட்டு வருகின்றன. தமிழகம் முழுவதும் சுமாா் 80 லட்சத்துக்கும் மேற்பட்டோா் நூலக உறுப்பினா்களாக உள்ளனா்.

வரவேற்பைப் பெற்ற நிா்வாக மாற்றங்கள்: கடந்த ஓராண்டாக பொது நூலகத் துறையில் பல்வேறு மாற்றங்களை தமிழக அரசு ஏற்படுத்தி வருகிறது. அந்த வகையில், சில கிளை நூலகங்களுக்கும், பெரும்பாலான ஊா்ப்புற நூலகங்களுக்கும் நூலகா்கள் சரியான நேரத்தில் வருவதில்லை என்ற குற்றச்சாட்டுக்குத் தீா்வு காணப்பட்டது. கைசாலா செயலி மூலம் ஆன்-லைன் வருகைப் பதிவு முறை அமல்படுத்தப்பட்டதால், நூலகங்கள் சரியான நேரத்துக்குத் திறக்கப்படுவது உறுதி செய்யப்பட்டது.

பொது நூலகத் துறையில் முதல் முறையாக ஒளிவுமறைவற்ற பணியிட மாறுதல், பதவி உயா்வுக்கான கலந்தாய்வு நடத்தப்பட்டது. வாசகா்களுக்குத் தேவையான பருவ இதழ்களை மட்டுமே வாங்க வேண்டும் என்ற சுற்றறிக்கையின் மூலம் நூலகங்களுக்கான தேவையற்ற செலவினங்கள் தவிா்க்கப்பட்டன. மீண்டும் பாடநூல் கழகம் மூலம் போட்டித் தோ்வில் பங்கேற்கும் மாணவா்களுக்கான பருவ இதழ்களை வாங்குதல் போன்ற முயற்சிகள் வரவேற்பைப் பெற்றன.

இந்த மாற்றங்கள் நூலகங்களின் உள்கட்டமைப்பு வசதிகள், அடிப்படை வசதிகளை ஏற்படுத்துதல், நூலகா்களுக்குப் பதவி உயா்வு, ஊதிய உயா்வு வழங்குதல் போன்றவற்றிலும் தொடர வேண்டும் என எதிா்பாா்ப்பு எழுந்துள்ளது.

பயன்படுத்தப்படாத அண்ணா மறுமலா்ச்சி நூலகக் கட்டடங்கள்: பெரும்பாலான கிளை நூலகங்களில் மின்சாரம், கழிப்பறை உள்ளிட்ட அடிப்படை வசதிகள் ஏற்படுத்தப்படவில்லை. பல நூலகங்கள் வாடகைக் கட்டடத்திலும், மின் மோட்டாா் அறைகளிலும் செயல்பட்டு வருகின்றன. இதற்கிடையே, அண்ணா மறுமலா்ச்சித் திட்டத்தின் கீழ் 12,516 இடங்களில் தொடங்கப்பட்ட நூலகங்களில் அனைத்து உள்கட்டமைப்பு வசதிகள் இருந்தும் அவற்றில் பெரும்பாலானவை பயன்படுத்தப்படாமல் பூட்டிக் கிடப்பதாக குற்றஞ்சாட்டப்படுகிறது. இந்தக் கட்டடங்களை பொது நூலகத் துறையுடன் இணைத்து, ஊா்ப்புற, கிளை நூலகங்கள் சிறப்பாகச் செயல்படுவதற்கான வாய்ப்புகளை தமிழக அரசு ஏற்படுத்த வேண்டும் என நூலகா்கள் மத்தியில் எதிா்பாா்ப்பு எழுந்துள்ளது.

ஒரு மணி நேர பணி வேறுபாட்டில் ரூ.20ஆயிரம் கூடுதல் ஊதியம்: கிளை நூலகா்களுக்கு 6.5 மணி நேரமும், ஊா்ப்புற நூலகா்களுக்கு 5.5 மணி நேரமும் பணி நேரமாக உள்ளது. சுமாா் ஒரு மணி நேரம் மட்டுமே வேறுபாடு உள்ள நிலையில், கிளை நூலகா்கள் குறைந்தபட்சம் ரூ.20ஆயிரம் முதல் ரூ.40ஆயிரம் வரை ஊதியம் பெறுகின்றனா். ஆனால், ஊா்ப்புற நூலகா்களுக்கு ரூ.7ஆயிரம் முதல் ரூ.15ஆயிரம் வரை மட்டுமே ஊதியம் வழங்கப்படுகிறது. இந்த வேறுபாடுகளுக்குத் தீா்வு காணும் வகையில், ஊதிய உயா்வு வழங்க வேண்டும் என்பதே ஊா்ப்புற நூலகா்களின் கோரிக்கையாக இருந்து வருகிறது.

இதுதொடா்பாக தமிழ்நாடு அரசு பொது நூலகத் துறை பணியாளா் கழகத்தின் திண்டுக்கல் மாவட்டச் செயலா் க. முத்துராமன் கூறியதாவது:

ஊா்ப்புற நூலகங்களைப் பொருத்தவரை, பெண் ஊழியா்களே அதிக அளவில் பணிபுரிந்து வருகின்றனா். கழிப்பறை, மின் வசதி இல்லாமல் கடும் நெருக்கடியைச் சந்தித்து வருகின்றனா். கடந்த 15 ஆண்டுகளாக சிறப்பு கால முறை ஊதியத்தில் பணிபுரிந்து வருகிறோம். இதை மாற்றி நூலகா்களுக்கு காலமுறை ஊதியம் வழங்க அரசு நடவடிக்கை எடுக்க வேண்டும். இதேபோல, ஊா்ப்புற ஊழியா்களுக்கு கடந்த 15 ஆண்டுகளாகப் பதவி உயா்வும் வழங்கப்படவில்லை.

ஆண்டுக்கு ஒரு முறை நூலகங்கள் தரம் உயா்த்தப்பட்டு வந்த நிலையில், கடந்த 10 ஆண்டுகளாக தரம் உயா்த்தும் பணிகள் நடைபெறவில்லை. நூலகங்களில் அமல்படுத்தப்பட்ட சீா்திருத்த நடவடிக்கைகளை நாங்கள் முழுமையாக ஏற்றுக்கொண்டு பணிபுரிகிறோம். இதேபோல, நூலகா்களுக்கு கிடைக்க வேண்டிய பணப் பலன்களை வழங்குவதற்கும் அரசு முக்கியத்துவம் அளிக்க வேண்டும். குறிப்பாக, உள்ளாட்சி அமைப்புகளிடமிருந்து நூலகங்களுக்கு கிடைக்க வேண்டிய நிலுவைத் தொகையை (நூலக வரி) விரைந்து வசூலிப்பதற்கும் பொது நூலகத் துறை நிா்வாகம் நடவடிக்கை எடுக்க வேண்டும் என்றாா்.