கோடை கால விளையாட்டு பயிற்சி: மே 1-இல் தொடக்கம்

திண்டுக்கல் மாவட்ட விளையாட்டு அரங்கில் மாணவா்களுக்கான கோடை கால பயிற்சி முகாம் அடுத்த மாதம் 1-ஆம் தேதி தொடங்குகிறது.

இதுதொடா்பாக மாவட்ட விளையாட்டு அலுவலா் ம.ரோஸ் பாத்திமா மேரி தெரிவித்ததாவது:

திண்டுக்கல் மாவட்ட விளையாட்டு அரங்கில் தடகளம், கூடைப் பந்து, கால்பந்து, கையுந்துப் பந்து, ஹாக்கி விளையாட்டுகளில் மாணவா்களுக்கான கோடை கால பயிற்சி முகாம் மே 1 முதல் 15-ஆம் தேதி வரை நடைபெறுகிறது.

நாள்தோறும் காலை 6 முதல் 8.30 மணி வரையிலும், மாலை 4 முதல் 6.30 மணி வரையிலும் சிறந்த பயிற்றுநா்களைக் கொண்டு பயிற்சி அளிக்கப்படவுள்ளது.

இந்தப் பயிற்சி முகாமில் கலந்து கொள்ளும் அனைத்து மாணவா்களுக்கும் பங்கேற்புச் சான்றிதழ் வழங்கப்படும். விருப்பமுள்ள மாணவா்கள் மே 1-ஆம் தேதி காலை 6 மணிக்கு மாவட்ட விளையாட்டு அரங்கத்துக்கு வர வேண்டும். இதுதொடா்பான கூடுதல் விவரங்களுக்கு மாவட்ட விளையாட்டு அலுவலரை 7401703504 என்ற எண்ணில் தொடா்பு கொள்ளலாம் என்றாா் அவா்.