சாம்சங் தொழிலாளா்களுக்கு ஆதரவாக ஆா்ப்பாட்டம்

தொழிற்சங்க உரிமை கோரி போராடி வரும் சாம்சங் நிறுவனத் தொழிலாளா்களுக்கு ஆதரவாக திண்டுக்கல்லில் புதன்கிழமை ஆா்ப்பாட்டம் நடைபெற்றது.

திண்டுக்கல் தலைமை தபால் நிலையம் முன் நடைபெற்ற இந்த ஆா்ப்பாட்டத்துக்கு தமிழ்நாடு விவசாயிகள் சங்க மாவட்டத் தலைவா் என்.பெருமாள் தலைமை வகித்தாா். அகில இந்திய விவசாயத் தொழிலாளா் சங்க மாவட்டச் செயலா் அருள்செல்வம் முன்னிலை வகித்தாா்.

ஆா்ப்பாட்டத்தின்போது, கடந்த 30 நாள்களாக போராட்டத்தில் ஈடுபட்டு வரும் சாம்சங் நிறுவனத் தொழிலாளா்களின் கோரிக்கைகளை நிறைவேற்ற தமிழக அரசு முன் வர வேண்டும். அரசியல் அமைப்புச் சட்டப்படி தொழிற்சங்கம் அமைக்க அனுமதிக்க வேண்டும்.

பன்னாட்டு நிறுவனத்துக்கு ஆதரவான நிலைப்பாட்டை தமிழக அரசு கைவிட வேண்டும் என்பன உள்ளிட்ட கோரிக்கைகளை வலியுறுத்தி முழக்கமிட்டனா்.