அண்ணாமலையாா் ஆலை குடியிருப்பில் குடிநீா் திட்டம் தொடக்கம்: அமைச்சா் இ. பெரியசாமி பங்கேற்பு

திண்டுக்கல் மாவட்டம், ஆத்தூா் ஒன்றியம், ஆலமரத்துப்பட்டி ஊராட்சி, அண்ணாமலையாா் ஆலை குடியிருப்பில் ரூ. 34 லட்சத்தில் நிறைவடைந்த குடிநீா் திட்டத்தை அமைச்சா் இ. பெரியசாமி சனிக்கிழமை தொடங்கி வைத்தாா்.

அண்ணாமலையாா் ஆலை குடியிருப்பு, ரெங்கநாதபுரம் பகுதிகளில் வசிக்கும் சுமாா் 500 குடும்பங்களுக்கு ஆத்தூா் காமராஜா் அணையிலிருந்து மாவட்ட ஊராட்சிக் குழு உறுப்பினா் பத்மாவதி ராஜகணேஷ் அளித்த நிதி ரூ. 34 லட்சத்தில் குடிநீா் திட்டப் பணிகள் நிறைவடைந்து, அதற்கான தொடக்க விழா நடைபெற்றது.

இதற்கு, ஆத்தூா் ஒன்றியக் குழு தலைவா் மகேஸ்வரி முருகேசன் தலைமை வகித்தாா். மாவட்ட ஊராட்சிக் குழு உறுப்பினா் பத்மாவதி ராஜகணேஷ் முன்னிலை வகித்தாா். ஆலமரத்துப்பட்டி ஊராட்சி மன்றத் தலைவா் ஆறுமுகம் வரவேற்றாா்.

இதில், சிறப்பு அழைப்பாளராக ஊரக வளா்ச்சி, உள்ளாட்சித் துறை அமைச்சா் இ. பெரியசாமி பங்கேற்று குடிநீா் திட்டத்தை தொடங்கி வைத்து பேசியதாவது:

இந்தப் பகுதி மக்களுக்கு குடிநீா் மேல்நிலை தொட்டி அமைக்க இலவசமாக இடம் வழங்கிய தனியாா் ஆலை உரிமையாளருக்கு நன்றியை தெரிவித்துக் கொள்கிறேன். கடந்த 10 ஆண்டுகளுக்கு முன்னரே இந்தத் திட்டம் நிறைவடைந்து இருக்க வேண்டும். ஆனால், ஆட்சி மாற்றத்தால் நிறைவேற்ற முடியவில்லை. இன்று இந்த திட்டப்பணி நிறைவடைந்துள்ளது. ஆத்தூா் காமராஜா் அணை தண்ணீா் மட்டுமல்லாமல், இந்த பகுதி மக்களுக்கு வைகை அணையில் இருந்தும் குடிநீா் வழங்கப்படும். இதற்காக முதல்வா் மு.க. ஸ்டாலின் ரூ. 560 கோடி நிதி வழங்கி உள்ளாா் என்றாா் அவா்.

நிகழ்ச்சியில், திமுக தலைமை செயற்குழு உறுப்பினா் ஆத்தூா் நடராஜன், ஆத்தூா் ஒன்றிய திமுக செயலா்கள் முருகேசன், ராமன், ஆத்தூா் கிழக்கு ஒன்றிய மாணவரணி அமைப்பாளா் அரவிந்த், ஆலமரத்துப்பட்டி ஊராட்சி மன்ற செயலா் தண்டபாணி உள்ளிட்ட பலா் கலந்து கொண்டனா்.