கோடை கால நீச்சல் பயிற்சி தொடக்கம்

மதுரையில் எம்.ஜி.ஆர். விளையாட்டு மைதானத்தில் உள்ள நீச்சல் குளத்தில்  கோடைகால நீச்சல் பயிற்சி வகுப்புகள் தொடங்கியுள்ளன. 
     இது குறித்து மாவட்ட விளையாட்டு அலுவலர் கி.த. ராஜகுமார் கூறியதாவது: பள்ளிகளின் கோடை விடுமுறையை முன்னிட்டு, மதுரை எம்.ஜி.ஆர். விளையாட்டு மைதானத்தில் (ரேஸ் கோர்ஸ்) உள்ள நீச்சல் குளத்தில் கோடைகால நீச்சல் பயிற்சி வகுப்புகள் தொடங்கப்பட்டுள்ளன. இதில், 8 வயது முதல் சிறுவர், சிறுமியர் அனைவரும் பங்கேற்கலாம். பயிற்சி வகுப்புகள் 13 நாள்களாக நடத்தப்படவுள்ளன. இதற்கு கட்டணமாக ரூ.1500 வசூலிக்கப்படுகிறது.
      காலை, மாலை என இரு வேளைகளில் நடைபெறும் இப் பயிற்சி வகுப்பில், சிறப்பு பயிற்சியாளர்களால் நீச்சல் கற்றுத் தரப்படுகிறது என்றார்.
    மாநகராட்சி நீச்சல் குளம்: உலகத் தமிழ் சங்கம் அருகேயுள்ள மதுரை மாநகராட்சி நீச்சல் குளம் தனியார் பராமரிப்பின் கீழ் உள்ளது.
 இங்கு, கோடை கால நீச்சல் பயிற்சி வகுப்புகள் தொடங்கியுள்ளன. கட்டண அடிப்படையில் குழந்தைகள் முதல் பெரியவர்கள் வரை நீச்சல் பயிற்சியில் சேர்க்கப்பட உள்ளதாக, மாநகராட்சி அலுவலர்கள் தெரிவித்தனர். 
    ஹாக்கி போட்டிகள்: மாநில அளவிலான ஹாக்கி போட்டிகள், மதுரையில் ஓரிரு வாரங்களில் நடைபெறவுள்ளன. இப்போட்டிகளில் மதுரை, ராமநாதபுரம், தேனி, திண்டுக்கல், கரூர் ஆகிய மாவட்ட அணிகள் பங்கேற்கவுள்ளன. 
    எனவே,  ஹாக்கி மைதானங்கள் சீரமைக்கும் பணி தற்போது தொடங்கப்பட்டுள்ளது.