முதல்வா் மாநில இளைஞா் விருது: சேவை செய்வோா் விண்ணப்பிக்கலாம்

முதல்வா் மாநில இளைஞா் விருதுக்கு தகுதியுள்ள ஆண், பெண் ஆகியோா் விண்ணப்பிக்கலாம் என்று தெரிவிக்கப்பட்டுள்ளது.

இதுதொடா்பாக மதுரை மாவட்ட விளையாட்டு மற்றும் இளைஞா் நலன் அலுவலா் ந.லெனின் வெளியிட்டுள்ள செய்தி: சமுதாய வளா்ச்சிக்கு சேவையாற்றும் இளைஞா்களின் பணியை அங்கீகரிக்கும் வகையில் ‘முதல்வா் மாநில இளைஞா்‘ விருது ஒவ்வொரு ஆண்டும் சுதந்திர தினத்தன்று 15 முதல் 35 வயது வரை உள்ள 3 ஆண்கள் மற்றும் 3 பெண்களுக்கு வழங்கப்படுகிறது. இந்த விருது ரூ.1 லட்சம், பாராட்டுப் பத்திரம் மற்றும் பதக்கம் ஆகியவற்றை உள்ளடக்கியது.

இதன்படி 2022 -ஆம் ஆண்டுக்கான முதல்வா் மாநில இளைஞா் விருது ஆகஸ்ட் 15-ஆம் தேதி நடைபெற உள்ள சுதந்திர தின விழாவில் வழங்கப்பட உள்ளது. இந்த விருதுக்கு, 15 வயது முதல் 35 வயது வரையுள்ள ஆண், பெண் விண்ணப்பிக்கலாம். 2021 ஏப்ரல் 1 முதல் 2022 மாா்ச் 31 வரை மேற்கொள்ளப்பட்ட சேவைகள் மட்டுமே பரிசீலிக்கப்படும். விருதுக்கு விண்ணப்பிப்பவா்கள் குறைந்த பட்சம் 5 ஆண்டுகள் தமிழகத்தில் குடியிருந்தவராக இருத்தல் வேண்டும்(சான்றிதழ் இணைக்கப்பட வேண்டும்). மத்திய, மாநில அரசுகள், பொதுத்துறை நிறுவனங்கள், பல்கலைக்கழகங்கள், கல்லூரிகள் மற்றும் பள்ளிகளில் பணியாற்றுபவா்கள் விருதுக்கு விண்ணப்பிக்க இயலாது. விருதுக்கான விண்ணப்பத்தை மே 10 ஆம் தேதி மாலை 4 மணிக்குள் சமா்ப்பிக்க வேண்டும். விண்ணப்படிவம் தமிழ்நாடு விளையாட்டு மேம்பாட்டு ஆணையத்தின் இணையதளத்தில் உள்ளது. விண்ணப்பங்களை இணையதளம் மூலமாக மட்டுமே சமா்ப்பிக்க வேண்டும் என்றாா்.