நூறு நாள் வேலை ஒருங்கிணைப்பாளா் பணி நியமன நிபந்தனைகளை ரத்து செய்யக் கோரி வழக்குஊரக வளா்ச்சித் துறை செயலா் பதிலளிக்க உத்தரவு

பணிநீக்கம் செய்யப்பட்ட மக்கள் நலப்பணியாளா்கள், வேலை உறுதித் திட்ட ஒருங்கிணைப்பாளா் நியமனம் பெறுவதற்கு விதிக்கப்பட்ட நிபந்தனைகளை ரத்து செய்யக் கோரிய மனுவுக்கு,

தமிழக அரசின் ஊரக வளா்ச்சித் துறை செயலா், மதுரை, ராமநாதபுரம், தேனி மாவட்டங்களின் ஆட்சியா்கள் பதிலளிக்க, சென்னை உயா் நீதிமன்ற மதுரை கிளை உத்தரவிடப்பட்டுள்ளது.

முந்தைய ஆட்சியின்போது பணிநீக்கம் செய்யப்பட்ட மக்கள் நலப் பணியாளா்களை, அவா்களது விருப்பத்தின்பேரில் மகாத்மா காந்தி தேசிய ஊரக வேலை உறுதித் திட்ட ஒருங்கிணைப்பாளராக நியமனம் செய்வதற்கான நடவடிக்கைகளை, தமிழக அரசு மேற்கொண்டு வருகிறது.

இவ்வாறு நியமனம் கோருவோருக்கு சில நிபந்தனைகள் விதிக்கப்பட்டுள்ளன. அதில், மக்கள் நலப்பணியாளராகப் பணிபுரிந்த முந்தைய காலத்துக்கான முன்னுரிமை, பணி தொடா்ச்சி ஏதும் கோரமாட்டேன் என சம்மதம் தெரிவிக்க வேண்டும் என உத்தரவிடப்பட்டுள்ளது.

இந்த உத்தரவை ரத்து செய்யக் கோரி, மதுரை மாவட்டம் மேலூரைச் சோ்ந்த ரவி, தேனியைச் சோ்ந்த மணிவேலன், சிவகங்கையைச் சோ்ந்த செல்வம் ஆகியோா் சென்னை உயா் நீதிமன்ற மதுரை கிளையில் மனு தாக்கல் செய்திருந்தனா்.

இந்த மனுவை விசாரித்த நீதிபதி எம்.எஸ். ரமேஷ், தமிழக அரசின் ஊரக வளா்ச்சித் துறை செயலா், மதுரை, தேனி, சிவகங்கை மாவட்ட ஆட்சியா்கள் பதில் மனு தாக்கல் செய்ய உத்தரவிட்டுள்ளாா்.