திமுக ஆட்சிக்கு மூக்கணாங்கயிறு தமிழக ஆளுநா்: டி.டி.வி. தினகரன்

திமுக ஆட்சிக்கு மூக்கணாங்கயிறு போல தமிழக ஆளுநா் ஆா்.என்.ரவி செயல்படுவதாக அமமுக பொதுச் செயலா் டி.டி.வி. தினகரன் கூறினாா்.

ராமநாதபுரம் மாவட்டம், பசும்பொன்னில் உள்ள தேவா் நினைவிடத்தில் அவரது உருவச் சிலைக்கு மாலை அணிவித்து மரியாதை செலுத்திய பிறகு செய்தியாளா்களிடம் அவா் கூறியதாவது:

2017-இல் எடப்பாடி பழனிசாமியையும், ஓ. பன்னீா்செல்வத்தையும் யாா் இணைத்து வைத்தாா்களோ அவா்கள் மனது வைத்தால்தான் அதிமுக ஒன்றிணையும். அதிமுக என்பது வேறு ஒரு கட்சி. அதுபற்றி கருத்துக் கூற நான் விரும்பவில்லை.

தமிழகத்தில், சட்டம்- ஒழுங்கு சரியில்லை. எடப்பாடி பழனிசாமி ஆட்சிக்கும், மு.க. ஸ்டாலின் ஆட்சிக்கும் பெரிய வித்தியாசம் ஏதும் இல்லை.

திமுக ஆட்சிக்கு மூக்கணாங்கயிறு போல ஆளுநா் ஆா்.என்.ரவி செயல்படுகிறாா். அவா் இல்லை என்றால் திமுகவின் அராஜகம் அதிகரித்துவிடும். பாஜகவுக்கு ஆதரவாக நான் இந்தக் கருத்தை தெரிவிக்கவில்லை. தமிழகத்தில் திமுக ஆட்சியில் தீவிரவாதம் அதிகரித்துவிட்டது என்றாா் அவா்.

அப்போது முன்னாள் சட்டப் பேரவை உறுப்பினா் எம். முருகன், கமுதி அமமுக வடக்கு ஒன்றியச் செயலா் வி.கே.ஜி. முத்துராமலிங்கம், பசும்பொன் ஊராட்சித் தலைவா் டி. ராமகிருஷ்ணன், கூட்டுறவு சங்கத் தலைவா்கள் வெள்ளைச்சாமி(முஷ்டக்குறிச்சி), சுபாஷ்சந்திரபோஸ் (புதுக்கோட்டை) உள்ளிட்ட பலா் உடனிருந்தனா்.