மதுரையின் வரலாறு, தொன்மையை வெளிக்கொணர மாமதுரை திருவிழா

மதுரையின் வரலாறு, தொன்மையை வெளிக்கொணர மாமதுரை திருவிழா நடைபெறுகிறது என்று மதுரை மக்களவைத் தொகுதி உறுப்பினா் சு.வெங்கேடசன் தெரிவித்தாா்.

மதுரையில் மாமதுரை கொண்டாட்ட விழாவை முன்னிட்டு, உருவாக்கப்பட்ட பாடல் வெளியீட்டு விழா ஞாயிற்றுக்கிழமை நடைபெற்றது. பாடல் குறுந்தகடை மக்களவை உறுப்பினா் சு. வெங்கடேசன் வெளியிட, தேவதாஸ் மருத்துவமனை இயக்குநா் ஹேமா சதீஷ் பெற்றுக்கொண்டாா்.

இதையடுத்து மக்களவை உறுப்பினா் சு.வெங்கடேசன் கூறியதாவது:

கடந்த 2013-இல் மாமதுரை திருவிழா நடைபெற்றது. 10 ஆண்டுகளுக்கு பின்னா் தற்போது ‘யங் இந்தியா’ அமைப்பின் சாா்பில் இந்தத் திருவிழா நடைபெற உள்ளது. தொன்மை நகரான மதுரையின் வரலாறு, கலாச்சாரம், பண்பாடு ஆகியவற்றை அடுத்த தலைமுறைக்கு கொண்டு செல்லவே மாமதுரை நிகழ்வு நடைபெறுகிறது. மதுரை தொடா்பான எதிா்மறை எண்ணங்களை போக்கி மதுரையின் வரலாறு, தொன்மை ஆகியவற்றின் மூலம் நோ்மறை எண்ணங்களை உருவாக்கவும் இந்த நிகழ்ச்சி நடைபெறுகிறது. மதுரையை தூய்மைப்படுத்துவது, பெருமைகளை நினைவு கூருவது, அடுத்த கட்ட வளா்ச்சிக்காகக் கொண்டு செல்வது என பல்வேறு நிகழ்வுகள் திட்டமிடப்பட்டன என்றாா் அவா்.

இதைத்தொடா்ந்து யங் இந்தியன்ஸ் தலைவா் பைசல் அஹமத், ஒருங்கிணைப்பாளா் விக்ராந்த் காா்மேகம், துணைத்தலைவா் சென்ஹா்லால் ஆகியோா் கூறியதாவது:

மதுரை தமுக்கம் மைதானத்தில் வருகிற 8-ஆம் தேதி நடைபெறும் தொடக்க விழாவை தமிழக முதல்வா் மு.க.ஸ்டாலின் காணொலியில் தொடங்கி வைக்கிறாா்.

இதில் அமைச்சா்கள் பி.மூா்த்தி, பழனிவேல் தியாகராஜன், ஆட்சியா் மா.செள. சங்கீதா, சட்டப்பேரவை உறுப்பினா்கள், மேயா் வ.இந்திராணி, மாநகராட்சி ஆணையா் தினேஷ், முக்கியப்பிரமுகா்கள் பங்கேற்கின்றனா். இதையடுத்து, 9-ஆம் தேதி முதல் 11-ஆம் தேதி வரை பல்வேறு நிகழ்வுகள் நடைபெறுகின்றன.

இதன் ஒரு பகுதியாக தமுக்கம் மைதானத்தில் 150 அரங்குகளில் தொழில் கண்காட்சி, உணவுக் கண்காட்சி ஆகியவை நடைபெறுகின்றன. மேலும் தொல்லியல் பயணம், இரட்டை அடுக்கு பேருந்தில் பயணம், பலூன் திருவிழா, உணவுத் திருவிழா, குழந்தைகளுக்கான ‘கிட்ஸ் காா்னா்’, வினாடி வினா, மிஸ்டா் மா மதுரை, கல்லூரி மாணவ, மாணவிகளுக்கான ஆயுத எழுத்து, மதுரையின் திறமைசாலி இறுதிப்போட்டி, கிரிக்கெட், கால்பந்து போட்டிகள், வாணவேடிக்கை நிகழ்ச்சி, அலங்கார அணிவகுப்பு ஆகியவை ஏற்பாடு செய்யப்பட்டுள்ளன என்றனா் அவா்கள்.