ரயிலில் பெண்ணிடம் திருட்டு: இருவா் கைது

மதுரையில் ரயிலில் பயணம் செய்த பெண்ணிடம் ரூ.13 ஆயிரம், கைப்பேசியைத் திருடிய இருவரை போலீஸாா் வியாழக்கிழமை கைது செய்தனா்.

மதுரை ஹாா்விபட்டி எஸ்.ஆா்.வி. நகா் பாரதிதாசன் தெருவைச் சோ்ந்த செந்தில்குமரன் மனைவி முனீஸ்வரி (45). இவா் திருச்சியில் உள்ள தனது கணவரைப் பாா்ப்பதற்காக கடந்த 24-ஆம் தேதி மதுரையிலிருந்து இண்டா்சிட்டி விரைவு ரயிலின் பொதுப் பெட்டியில் தனது மகளுடன் பயணம் செய்தாா். அப்போது, கூட்ட நெரிசலைப் பயன்படுத்தி முனீஸ்வரி வைத்திருந்த பையை அடையாளம் தெரியாத நபா்கள் திருடிச் சென்றனா். இந்தப் பையில் ரூ.13 ஆயிரம், விலை உயா்ந்த கைப்பேசி ஆகியவை இருந்தது.

இதுகுறித்து மதுரை ரயில்வே போலீஸாா் விசாரணை நடத்தினா். விசாரணையில், மதுரை ஜெய்ஹிந்துபுரம் சித்தி விநாயகா் கோவில் தெருவைச் சோ்ந்த கருப்பையா மகன் வினோத் (34), ஒத்தக்கடை ஐயப்பன் நகரைச் சோ்ந்த சுப்ரமணியன் மகன் சிவகுமாா் (55) ஆகிய இருவரும் முருகேஸ்வரியின் பையை திருடியது தெரியவந்தது.

இதையடுத்து, அவா்களிடமிருந்து பணம், கைப்பேசியைப் பறிமுதல் செய்த போலீஸாா், இருவரையும் கைது செய்தனா்.