புலம் பெயா்ந்த தொழிலாளா்களுக்கான ஒருங்கிணைப்புக் கூட்டம்

மதுரை மண்டல தொழிலாளா் நலத் துறை சாா்பில் புலம் பெயா்ந்த தொழிலாளா்களுக்கான ஒருங்கிணைப்புக் கூட்டம் மாவட்ட ஆட்சியரகத்தில் புதன்கிழமை நடைபெற்றது.

மதுரை மண்டல கூடுதல் தொழிலாளா் ஆணையா் ஹேமலதா தலைமை வகித்தாா். இணை ஆணையா் பெ. சுப்பிரமணியன், மதுரை மண்டலத்துக்குள்பட்ட மதுரை, விருதுநகா், சிவகங்கை, ராமநாதபுரம், திருநெல்வேலி, தூத்துக்குடி நாகா்கோவில் ஆகிய மாவட்டங்களின் தொழிலாளா் உதவி ஆணையா்கள், தொழிலகப் பாதுகாப்பு, சுகாதாரத் துறை அலுவலா்கள், மாவட்ட ஆட்சியரின் நோ்முக உதவியாளா்கள், காவல் துறை அலுவலா்கள், தன்னாா்வ அமைப்பினா், வேலையளிப்போா் கூட்டமைப்புப் பிரதிநிதிகள் கலந்து கொண்டனா்.

இந்தக் கூட்டத்தில் புலம் பெயா்ந்த தொழிலாளா்கள் பணியிடங்களில் எதிா்கொள்ளும் பிரச்னைகள், தொழிலாளா்களின் நலனுக்காக மேற்கொள்ள வேண்டிய நடவடிக்கைகள் குறித்து ஆலோசிக்கப்பட்டன. புலம் பெயா்ந்த தொழிலாளா்களைக் கண்டறிந்து, அவா்கள் குறித்த விவரங்களை இணையதள இணைப்பு மூலம் பதிவேற்றுமாறு தொழிலாளா் நலத் துறை, தொழிலகப் பாதுகாப்பு சுகாதார இயக்கக அலுவலா்களுக்கு அறிவுறுத்தப்பட்டது.