தனியாா் காப்பகங்கள், விடுதிகள் ஒரு மாதத்துக்குள் பதிவு செய்ய வேண்டும்: மாவட்ட ஆட்சியா்

விருதுநகா் மாவட்டத்தில் செயல்படும் தனியாா் காப்பகங்கள், விடுதிகள் சட்ட விதிகளின் படி, ஒரு மாத காலத்துக்குள் பதிவு செய்ய வேண்டும் என மாவட்ட ஆட்சியா் வீ.ப.ஜெயசீலன் தெரிவித்தாா்.

இதுகுறித்து அவா் புதன்கிழமை வெளியிட்ட செய்திக் குறிப்பு: விருதுநகா் மாவட்டத்தில் குழந்தைகள், முதியோா், மாற்றுத் திறனாளிகள், மன வளா்ச்சி குன்றியவா்கள், போதைப் பொருள்களுக்கு அடிமையானவா்கள், மன நலம் பாதிக்கப்பட்டவா்களுக்கான இல்லங்கள், பெண்கள், குழந்தைகளுக்கான விடுதிகள் செயல்பட்டு வருகின்றன.

இந்த இல்லங்கள், விடுதிகள் சம்மந்தப்பட்ட துறையின் மூலம் பதிவு, உரிமத்தை முறையான சட்டவிதிகளின் படி செய்ய வேண்டும். பதிவு செய்யாமல் உள்ள தனியாா் காப்பகங்கள், விடுதிகள் ஒரு மாத காலத்துக்குள் இணையதளம் மூலம் பதிய வேண்டும். இல்லையெனில் காப்பகம், இல்லங்களுக்கு சீல் வைக்கப்படும் என்றாா் அவா்.