கோயில் நிலங்கள் ஆக்கிரமிப்பு விவகாரம்: அறநிலையத் துறை ஆணையா் நேரில் ஆஜராக உத்தரவு

கரூா் வெண்ணெய்மலை பாலசுப்பிரமணிய சுவாமி கோயில் நிலங்களை ஆக்கிரமிப்பிலிருந்து மீட்க எடுக்கப்பட்ட நடவடிக்கைகள் குறித்து, இந்து சமய அறநிலையத் துறை ஆணையா், கரூா் மாவட்ட காவல் கண்காணிப்பாளா் உள்ளிட்ட அதிகாரிகள் நீதிமன்றத்தில் நேரில் முன்னிலையாகி விளக்கமளிக்க சென்னை உயா்நீதிமன்ற மதுரை அமா்வு அண்மையில் உத்தரவிட்டது.

திருத்தொண்டா் சபை நிறுவனா் ராதாகிருஷ்ணன் தாக்கல் செய்த நீதிமன்ற அவமதிப்பு வழக்கு:

கரூா் மாவட்டம், மண்மங்கலம் வட்டம், வெண்ணெய்மலையில் உள்ள பழைமை வாய்ந்த பாலசுப்பிரமணிய சுவாமி கோயிலுக்குச் சொந்தமாக பல நூறு ஏக்கா் நிலங்கள் உள்ளன. இவற்றில் கத்தப்பாறை, ஆத்தூா் ஆகிய பகுதிகளில் உள்ள கோயில் நிலங்கள் ஆக்கிரமிக்கப்பட்டன. இதனால், உரிய வருமானம் கிடைக்காமல் இந்தக் கோயிலில் சுவாமிக்கு பூஜை நடத்த இயலாத நிலை உள்ளது.

எனவே, ஆக்கிரமிப்பு நிலங்களை மீட்கக் கோரி, சென்னை உயா்நீதிமன்ற மதுரை அமா்வில் வழக்கு தொடுத்தேன். இதையடுத்து, ஆக்கிரமிப்பு நிலங்களை மீட்க இந்து சமய அறநிலையத் துறைக்கு நீதிமன்றம் உத்தரவிட்டது. ஆனால், இந்த நிலங்களை மீட்க அதிகாரிகள் எந்த நடவடிக்கையும் எடுக்க வில்லை. எனவே, சம்பந்தப்பட்ட அரசு அதிகாரிகள் மீது நீதிமன்ற அவமதிப்பு நடவடிக்கை எடுக்க வேண்டும் என அவா் கோரியிருந்தாா்.

இந்த வழக்கை விசாரித்த உயா்நீதிமன்ற நீதிபதிகள் வேல்முருகன், பி. புகழேந்தி அமா்வு பிறப்பித்த உத்தரவு:

வெண்ணெய்மலை பாலசுப்பிரமணிய சுவாமி கோயிலுக்குச் சொந்தமான நிலங்களை ஆக்கிமித்து பலா் தங்களது பெயா்களில் பட்டா பெற்றுள்ளனா். இது இந்து சமய அறநிலையத்துறை அதிகாரிகளின் உடந்தையின்றி நடைபெற வாய்ப்பில்லை.

ஆக்கிரமிப்புகளை அகற்றுவதால் சட்டம்-ஒழுங்கு பிரச்னை ஏற்படும் எனக் கூறுவது ஏற்றுக் கொள்ளும்படி இல்லை. எனவே, இந்து சமய அறநிலையத் துறை ஆணையரும், கடந்த 2019- ஆம் ஆண்டிலிருந்து தற்போது வரை இந்தக் கோயிலில் பணியாற்றி வரும் இணை ஆணையா் உள்ளிட்ட அனைத்து அறநிலையத் துறை அதிகாரிகளும், கரூா் மாவட்ட காவல் கண்காணிப்பாளரும் வருகிற 23- ஆம் தேதி நீதிமன்றத்தில் நேரில் முன்னிலையாக வேண்டும். அப்போது இந்தக் கோயில் நிலங்களை மீட்க எடுக்கப்பட்ட நடவடிக்கைகள் குறித்து அறிக்கை தாக்கல் செய்ய வேண்டும். வழக்கு விசாரணை ஒத்திவைக்கப்படுகிறது என்றனா் நீதிபதிகள்.