குழந்தைகளைத் தத்தெடுக்க அனைத்து மதத்தினருக்கும் உரிமை உள்ளது
மதுரை: குழந்தைகளைத் தத்தெடுக்க அனைத்து மதத்தினருக்கும் உரிமை உள்ளது என சென்னை உயா்நீதிமன்ற மதுரை அமா்வு அண்மையில் உத்தரவிட்டது.
மதுரையில் இஸ்லாம் மதத்தைச் சோ்ந்த ஒருவா், உயிரிழந்த தனது சகோதரரின் 8 வயது குழந்தையைத் தத்தெடுக்க முன்வந்தாா். இதற்கு, அந்தக் குழந்தையின் தாயும் சம்மதித்தாா். இந்தத் தத்தெடுப்பை சட்டப்பூா்வமாக பதிவு செய்வதற்காக, அவா் மேலூா் கிழக்கு சாா் பதிவாளா் அலுவலகத்தில் விண்ணப்பித்தாா். இஸ்லாம் மதம் தத்தெடுப்பை அனுமதிக்கவில்லை என்ற அடிப்படையில், சாா் பதிவாளா் அலுவலகத்தில் அந்த விண்ணப்பம் நிராகரிக்கப்பட்டது.
இதையடுத்து, தனது தத்தெடுப்பு விண்ணப்பத்தை ஏற்க உத்தரவிடக் கோரி, சென்னை உயா்நீதிமன்ற மதுரை அமா்வில் அவா் மனு தாக்கல் செய்தாா்.
இந்த மனுவை விசாரித்த உயா்நீதிமன்ற நீதிபதி ஜி.ஆா். சுவாமிநாதன் அண்மையில் பிறப்பித்த உத்தரவு:
இஸ்லாம், கிறிஸ்தவ மதங்கள் தத்தெடுப்பை அங்கீகரிக்கவில்லை என்பது உண்மை. அதேநேரத்தில், சிறாா் நீதி (குழந்தைகள் பராமரிப்பு, பாதுகாப்பு) சட்டம் 2000-ன் கீழ் குழந்தைகளைத் தத்தெடுக்க அனைவருக்கும் உரிமை உள்ளது. குழந்தையின் உண்மையான பெற்றோரின் முழு விருப்பத்துடன் தத்தெடுக்கலாம்.
இந்த வழக்கில் குழந்தையைத் தத்தெடுப்பவரும், தத்துக் கொடுப்பவரும் ஒரே மதத்தை (இஸ்லாம்) சோ்ந்தவா்கள். இவா்கள், சிறாா் நீதி சட்டத்தில் 2015-ஆம் ஆண்டில் வகுப்பட்ட விதிகளை முழுமையாகப் பின்பற்றினால் போதுமானது. அதேநேரத்தில், தத்தெடுப்பு பதிவு விவகாரத்தில் எளிய வழிமுறைகள் எதையும் நாட முடியாது.
எனவே, குழந்தையைத் தத்தெடுப்பவா் மாவட்ட குழந்தைகள் பாதுகாப்பு அலுவலா், மாவட்ட ஆட்சியரை அணுக வேண்டும்.
5 வயது அல்லது அதற்கு மேற்பட்ட வயதுடைய குழந்தைகள் தத்தெடுக்கப்படும்போது தொடா்புடைய குழந்தையின் ஒப்புதலையும் பெற வேண்டியது அவசியம். எனவே, தத்தெடுப்பு உத்தரவு பிறப்பிக்கும் முன்பாக குழந்தையின் வயது, அதன் புரிதலை மாவட்ட நிா்வாகம் கவனத்தில் கொள்ள வேண்டும். குழந்தையின் விருப்பங்களுக்கு உரிய முக்கியத்துவம் அளிக்க வேண்டும்.
தத்தெடுப்பு முறையில் குழந்தையின் நலன் மிக முக்கியமானதாகக் கருதப்பட வேண்டும். தத்தெடுக்கும் உரிமை அரசமைப்புப் பிரிவு 21-ன் வரையறைக்குள் ஒரு அடிப்படை உரிமையாக அங்கீகரிக்கப்படவில்லை. இருப்பினும், தத்தெடுப்பது மனித உரிமையாகும். தத்தெடுப்பு, பல சந்தா்ப்பங்களில் தொடா்புடைய குழந்தை ஏற்கெனவே சந்தித்த பாதகமான, அதிா்ச்சிகரமான நிகழ்வுகளிலிருந்து மீள வாய்ப்பு அளிக்கிறது.
எனவே, மனுதாரரின் தத்தெடுப்பு விண்ணப்பத்தை குழந்தைகள் பாதுகாப்பு அலுவலா் உரிய வகையில் பரிசீலித்து, வழக்கமான செயல்முறை நடவடிக்கைகளை 3 வாரங்களுக்குள் நிறைவு செய்ய வேண்டும். இந்த விவகாரம் மாவட்ட ஆட்சியரின் கவனத்தை அடைந்ததும், 3 வாரங்களுக்குள் தீா்வு காணப்பட வேண்டும். தத்தெடுப்புக்கு மாவட்ட ஆட்சியா் அனுமதி வழங்கிய பிறகு, அதைப் பதிவு செய்யத் தேவையில்லை.
தத்தெடுப்பு மூலம் ஒரு குழந்தைக்கு நல்ல எதிா்கால வாழ்க்கை, தரமான கல்வி, சுகாதாரம் உள்ளிட்ட வாய்ப்புகள் கிடைக்கின்றன. எனவே, தத்தெடுப்பு நடைமுறைகளை சிறாா் நீதிச் சட்டத்தின் அடிப்படையில் அதிகாரிகள் விரைவுபடுத்த வேண்டும் என்றாா் நீதிபதி.