மரங்களில் அடித்த ஆணிகளை அகற்றும் பணியில் மாணவா்

சாலையோரங்களில் உள்ள மரங்களில் அடிக்கப்பட்ட ஆணிகளை அகற்றும் பணியில் ஈடுபட்டு வரும் பள்ளி மாணவரை பலரும் பாராட்டி வருகின்றனா்.

மதுரை தியாகராஜா் நன்முறை மேல்நிலைப் பள்ளியில் 7-ஆம் வகுப்பு பயிலும் மாணவா் சுதா்ஸன். இவா், பள்ளி விடுமுறை நாள்களில் கிடைக்கும் நேரத்தை வீணடிக்காமல், சாலையோரங்களில் உள்ள மரங்களில் பொதுமக்களால் அடிக்கப்பட்ட பதாகைகள், ஆணிகளை அகற்றும் பணியில் ஈடுபட்டு வருகிறாா்.

மரங்களில் உள்ள ஆணிகளை அகற்றி விழிப்புணா்வு ஏற்படுத்தி வரும் பள்ளி மாணவா் சுதா்ஸனை, பள்ளி ஆசிரியா்கள், சமூக ஆா்வலா்கள் என பலரும் பாராட்டி வருகின்றனா்.

இதுகுறித்து மாணவா் சுதா்ஸன் கூறியதாவது:

சிறு வயது முதல் இயற்கை மீது எனக்கு ஆா்வம் உள்ளது. எனது தந்தையுடன் இணைந்து பசுமை மீட்பு பணிகளில் ஈடுபட்டு வருகிறேன். அந்த வகையில், மரங்களில் அடிக்கப்படும் ஆணிகளையும் அகற்றி வருகிறேன். பொதுவாக, சாலையோர மரங்களில் பதாகைகள், விளம்பரங்களை காட்சிப்படுத்தும் வகையில் ஆணிகள் அடிக்கப்படுகின்றன.

இதனால், மரங்களின் வாழ்நாள் குறைவதற்கு அதிக வாய்ப்பு உள்ளது. இதுபற்றி பொதுமக்களிடையே விழிப்புணா்வை ஏற்படுத்த வேண்டும் என்பதற்காகவும், தற்போது இருக்கும் மரங்களையாவது பாதுகாக்க வேண்டும் என்பதற்காகவே ஆணிகளை அகற்றி வருகிறேன் என்றாா் அவா்.