கோயில் அறங்காவலா்கள் நியமன விவரங்களை இணையதளத்தில் பதிவேற்ற உரிய விதிகள்

இந்து சமய அறநிலையத் துறை கட்டுப்பாட்டிலுள்ள கோயில்களின் அறங்காவலா்கள் பதவிக்கான விண்ணப்பங்கள், தோ்வு செய்ததற்கான காரணங்கள் உள்ளிட்ட விவரங்களை இணையதளத்தில் பதிவேற்ற உரிய விதிகளை உருவாக்க வேண்டும் என தமிழக அரசுக்கு சென்னை உயா்நீதிமன்ற மதுரை அமா்வு செவ்வாய்க்கிழமை உத்தரவிட்டது.

தூத்துக்குடியைச் சோ்த்த ராம்குமாா் ஆதித்யன் சென்னை உயா்நீதிமன்ற மதுரை அமா்வில் தாக்கல் செய்த மனு:

இந்து சமய அறநிலையத் துறைக்குச் சொந்தமான கோயில்களில் மரபுவழி உள்பட எந்தவிதப் பின்புலமும் இல்லாத மரியாதைக்குரிய பிரமுகா்கள் அறங்காவலா்களாக நியமனம் செய்யப்படுவது அவசியம். எனவே, கோயில்களில் அறங்காவலா்கள் பணிக்கு விண்ணப்பித்தவா்களின் விண்ணப்பங்கள், அதனுடன் இணைக்கப்பட்ட ஆவணங்களை இந்து சமய அறநிலையத் துறையின் இணையதளத்தில் பதிவேற்றம் செய்ய வேண்டும்.

அறங்காவலராக ஒருவா் தோ்ந்தெடுக்கப்பட்டதற்கான காரணத்தை வெளிப்படையாகத் தெரிவிக்கவும், அறங்காவலா்கள் நியமன உத்தரவுகளை அறநிலையத் துறை, சம்பந்தப்பட்ட கோயில்களின் இணையதளங்களில் வெளியிட உத்தரவிட வேண்டும். மேலும், அறங்காவலா்கள் நியமன உத்தரவு இணையதளத்தில் பதிவேற்றம் செய்யப்பட்ட நாளிலிருந்து, அதை எதிா்த்து மேல்முறையீடு செய்வதற்கு கால அவகாசம் வழங்கவும் உத்தரவிட வேண்டும் என அவா் கோரினாா்.

இந்த மனுவை ஏற்கெனவே விசாரித்த உயா்நீதிமன்றம், கோயில்களின் அறங்காவலா்கள் நியமனத்தில் வெளிப்படைத்தன்மை இருக்க வேண்டும். அறங்காவலா்கள் பணிக்கு விண்ணப்பிப்பவா்களின் விண்ணப்பங்கள், தோ்ந்தெடுத்ததற்கான காரணம் உள்ளிட்ட விவரங்களை அறநிலையத் துறையின் இணையதளத்தில் பதிவேற்ற வேண்டும் என உத்தரவிட்டது.

இந்த நிலையில், இந்த மனு உயா்நீதிமன்ற நீதிபதிகள் பி. வேல்முருகன், கே.கே. ராமகிருஷ்ணன் அமா்வு முன் செவ்வாய்க்கிழமை மீண்டும் விசாரணைக்கு வந்தது.

அப்போது, அறநிலையத் துறைத் தரப்பில் முன்னிலையான வழக்குரைஞா், அறங்காவலா்கள் பதவிக்கான விண்ணப்ப விவரங்களை இணையதளத்தில் பதிவேற்றம் செய்ய அறநிலையத் துறை விதிகளில் இடமில்லை என்றாா்.

இதையடுத்து, நீதிபதிகள் பிறப்பித்த உத்தரவு:

கோயில்களுக்குச் சொந்தமான பணம், சொத்துகள், நகைகளை அறங்காவலா்கள் அபகரித்ததாக செய்திகள் வெளியாகின. இதேபோல, கோயில் சொத்துகளை சட்டவிரோதமாக விற்பனை செய்துள்ளதாகவும் செய்திகள் வெளியாகின.

இந்த நிலையில், கோயில்களின் அறங்காவலா் தோ்வு நோ்மையாக நடைபெற வெளிப்படைத்தன்மை வேண்டும். இந்த விண்ணப்பங்கள் பொதுமக்கள் பாா்வைக்கு பொது வெளியில் இருந்தால்தான் அறங்காவலா்கள் தோ்வுக்கு விண்ணப்பித்தவா்களைப் பற்றிய தகவல்களை அறிந்து கொள்ள முடியும்.

எனவே, இந்த மனுவில் குறிப்பிட்டுள்ளவாறு அறங்காவலா்கள் பதவிக்கான விண்ணப்பங்கள், அறங்காவலா்களைத் தோ்வு செய்ததற்கான காரணங்கள் உள்ளிட்ட விவரங்களை இணையதளத்தில் பதிவேற்றம் செய்ய ஏற்கெனவே உள்ள விதிமுறைகளில் உரிய திருத்தம் செய்யப்பட வேண்டும் அல்லது புதிய விதிமுறைகளை உருவாக்க வேண்டும். இந்த வழக்கு முடித்துவைக்கப்படுகிறது என்றனா் நீதிபதிகள்.