ராமநாதசுவாமி கோயில் தீர்த்தங்களில் நீராடும் பெண்கள் உடைமாற்ற இடமின்றி தவிப்பு

ராமேசுவரம் ராமநாதசுவாமி கோயிலில் புதிதாக மாற்றியமைக்கப்பட்ட புனித தீர்த்தங்களுக்கு அருகில்  பெண்கள் உடைமாற்றும் அறைகள் இல்லாததால் பெண் பக்தர்கள் அவதிக்குள்ளாகி வருகின்றனர். 
ராமநாதபுரம் மாவட்டம் ராமேசுவரம் ராமநாதசுவாமி கோயிலில் உள்ள 22 புனித தீர்த்தங்களில் பக்தர்கள் சிரமமின்றி நீராடும் வகையில் ஏற்பாடு செய்ய வேண்டும் என இந்து அறநிலைத்துறைக்கு சென்னை உயர்நீதிமன்ற மதுரைக் கிளை உத்தரவிட்டது.  இதனையடுத்து கோயிலுக்குள் இருந்த  6 தீர்த்தங்கள் ரூ.30 லட்சம் மதிப்பீட்டில் மாற்றியமைக்கப்பட்டது. அக்டோபர் மாதத்தில் 5 தீர்த்தங்கள் பயன்பாட்டிற்கு வந்த நிலையில், டிசம்பர் 14 ஆம் தேதி முதல் மகாலட்சுமி தீர்த்தம் பயன்பாட்டிற்கு கொண்டு வரப்பட்டது. இதனையடுத்து புதிய தீர்த்தங்கள் அனைத்திலும் பக்தர்கள் நீராடி வருகின்றனர். தீர்த்தங்களில் நீராடிய  பெண்கள் உடை மாற்ற அறைகள் அமைக்கவில்லை.  இதனால் புனித நீராடி விட்டு வரும் பெண்கள் உடை மாற்ற இடமின்றி தவிக்கின்றனர். மேலும் பக்தர்கள் தீர்த்தம் நீராடச் செல்லும் வழியில் கற்களை கொட்டி வைத்துள்ளனர். இதனால் பக்தர்கள் கற்கள் மீது நடந்து செல்லும் நிலை ஏற்பட்டுள்ளது. இந்து அறநிலையத்துறை  புனித நீராடும் பெண்கள் உடைமாற்றும் வகையில் தற்காலிக தடுப்புகளை அமைக்க வேண்டும் என பக்தர்கள் கோரிக்கை விடுத்துள்ளனர்.