உப்பூரில் வெயிலுகந்த விநாயகர் கோயிலில் சதுர்த்தி: பூக்குழித் திருவிழா

திருவாடானை தாலுகா தொண்டி அருகே உப்பூரில் உள்ள வெயிலுகந்த விநாயகர் கோயிலில் சதுர்த்தி விழாவையொட்டி, பக்தர்கள் பூக்குழி இறங்கி நேர்த்திக்கடன் செலுத்தினர்.
      ராமநாதபுரம் சமஸ்தான தேவஸ்தானத்துக்குப் பாத்தியப்பட்ட இக்கோயில், ராமபிரான் சீதையை மீட்க இலங்கை செல்லும் முன் இந்த விநாயகரை வணங்கி விட்டுச் சென்றதாக புராண வரலாறு உள்ளது. இக்கோயிலில் ஆண்டுதோறும் விநாயகர் சதுர்த்தி கொண்டாடப்படுவது வழக்கம். இந்தாண்டு கடந்த 4 ஆம் தேதி கொடியேற்றத்துடன் விழா தொடங்கியது. விழாவின், முக்கிய நிகழ்ச்சியான சித்தி புத்தி திருக்கல்யாணம் கடந்த செவ்வாய்க்கிழமை நடைபெற்றது.    அதைத் தொடர்ந்து, புதன்கிழமை மாலை தேரோட்டம் நடைபெற்றது. வியாழக்கிழமை, பக்தர்கள் அருகே உள்ள மோர்பண்ணை கிராமத்தில் கடலில் புனித நீராடி பக்தர்கள் பால்குடம், மயில் காவடி, வேல் காவடி, பறவைக் காவடி எடுத்து வந்து பூக்குழி இறங்கி நேர்த்திக்கடன் செலுத்தினர்.
    இரவு கலைநிகழ்ச்சிகள் நடைபெற்றன. விழா ஏற்பாடுகளை, சமஸ்தான தேவஸ்தான நிர்வாகச் செயலர் பால்பாண்டியன், சரகப் பொறுப்பாளர் மகேந்திரன் மற்றும் கிராமத்தினர் செய்திருந்தனர்.