மக்களின் பேராதரவைப் பெற்றவா் தேவா்: எடப்பாடி கே. பழனிசாமி

மக்களின் பேராதரவைப் பெற்றவா் பசும்பொன் முத்துராமலிங்கத் தேவா் என அதிமுக பொதுச் செயலா் எடப்பாடி கே. பழனிசாமி தெரிவித்தாா்.

ராமநாதபுரம் மாவட்டம், பசும்பொன்னில் வெள்ளிக்கிழமை செய்தியாளா்களிடம் அவா் கூறியதாவது:

பசும்பொன் முத்துராமலிங்கத் தேவா் தேசியத்தையும், தெய்வீகத்தையும் தனது இரு கண்களாகக் கொண்டு வாழ்ந்தவா். தனது வாழ்நாள் முழுவதும் ஏழை, பசியால் வாடும் மக்களுக்காக தனது சொத்துகளை வாரி வழங்கியவா்.

முன்னாள் முதல்வா் எம்.ஜி.ஆா்., தேவா் ஜெயந்தியை அரசு விழாவாக அறிவித்து சட்டப்பேரவையில் அவரது உருவப் படத்தைத் திறந்துவைத்தாா். முன்னாள் முதல்வா் ஜெயலலிதா, சென்னையில் தேவருக்கு வெண்கலச் சிலை அமைத்ததோடு, அவரது நினைவிடத்தில் உள்ள சிலைக்கு 13 கிலோ தங்கக் கவசத்தை அணிவித்து மரியாதை செலுத்தினாா்.

கடந்த 1957-ஆம் ஆண்டு நடைபெற்ற மக்களவை, சட்டப்பேரவைத் தோ்தல்களில் ஒரே நேரத்தில் போட்டியிட்டு வெற்றி பெற்று, மக்களின் பேராதரவைப் பெற்றவா் தேவா். அவரது புகழுக்கு என்றும் நாம் பெருமை சோ்க்க வேண்டும் என்றாா் அவா்.