தேனி ஆட்சியர் அலுவலகத்தில் கரோனா அச்சம்

தேனி மாவட்ட ஆட்சியர் அலுவலகத்திற்கு வரும் அலுவலர்கள் மற்றும் பொதுமக்களை உடல் வெப்பநிலை பரிசோதனை செய்து அனுமதிக்கும் நடைமுறை கடைபிடிக்கப்படாததால் கரோனா அச்சம் எழுந்துள்ளது.

தேனி மாவட்ட ஆட்சியர் அலுவலகத்தில் பல்வேறு அரசுத் துறைகளைச் சேர்ந்த 400-க்கும் மேற்பட்ட அலுவலர்கள் மற்றும் ஊழியர்கள் பணியாற்றி வருகின்றனர். அரசு பல்துறை பெருந்திட்ட வளாகத்தில் உள்ள அலுவலகங்கள், காவல் கண்காணிப்பாளர் அலுவலகம், அரசு மருத்துவக் கல்லூரி மருத்துவமனை ஆகியவற்றிலிருந்து ஆய்வுக் கூட்டங்களுக்கும், பல்வேறு பணி நிமித்தமாகவும் தினமும் 500-க்கும் மேற்பட்ட அரசுத் துறை அலுவலர்கள் மற்றும் பொதுமக்களும் ஆட்சியர் அலுவலகத்திற்கு வந்து செல்கின்றனர்.

இவர்கள், ஆட்சியர் அலுவலக நுழைவு வாயிலில் கரோனா தீநுண்மி பரவல் தடுப்பு நடவடிக்கையாக உடல் வெப்ப நிலை பரிசோதனை செய்து அனுமதிக்கப்படுவதில்லை. மேலும், ஆட்சியர் அலுவலகத்திற்குள் செல்வோர் கைகளை கிருமி நாசினி கொண்டு கழுவி விட்டும், முகக் கவசம் அணிந்தும் சென்று வர வலியுறுத்தப்படுவதில்லை. இ-பாஸ் அனுமதி உள்ளிட்ட பல்வேறு பணிகளுக்காக வெளி மாநிலங்கள் மற்றும் மாவட்டங்ளைச் சேர்ந்த பலரும் ஆட்சியர் அலுவலகத்திற்கு வந்து செல்லும் நிலையில், அங்கு கரோனா தீநுண்மி பரவல் தடுப்பு முன்னெச்சரிக்கை நடவடிக்கைகள் மேற்கொள்ளப்படாதது ஆட்சியர் அலுவலகத்தில் பணிபுரியும் அலுவலர்கள் மற்றும் பொதுமக்களுக்கு அச்சத்தை ஏற்படுத்தியுள்ளது.

வங்கிகள், தனியார் நிறுவனங்கள், உணவகங்கள், பல்பொருள் அங்காடிகளுக்கு வரும் பொதுமக்கள் உடல் வெப்பநிலை பரிசோதனைக்குப் பின்பு அனுமதிக்கப்பட்டு வரும் நிலையில், கரோனா தீநுண்மி பரவல் தடுப்பு நடவடிக்கையாக ஆட்சியர் அலுவலகம், மாவட்ட காவல் கண்காணிப்பாளர் அலுவலகம் மற்றும் அரசு அலுவலகங்களிலும் உடல் வெப்பநிலையை பரிசோதித்து, கை கழுவி விட்டும், முகக் கவசம் அணிந்தும் அலுவலர்கள் மற்றும் பொதுமக்கள் வந்து செல்வதை உறுதி செய்யவும், அரசு பரிந்துரைத்துள்ள கபசுரக் குடிநீர், ஆர்சானிக் ஆல்பம் மாத்திரை வழங்கவும் மாவட்ட நிர்வாகம் நடவடிக்கை எடுக்க வேண்டும் என்று அரசு அலுவலர்கள் மற்றும் பொதுமக்கள் வலியுறுத்தியுள்ளனர்.