ஆண்டிபட்டியில் 31 மாணவ, மாணவிகளுக்கு கரோனா: பள்ளிக்கு விடுமுறை அறிவிப்பு

ஆண்டிபட்டி அரசு ஊராட்சி ஒன்றிய நடுநிலைப் பள்ளியில் படித்து வரும் 31 மாணவ, மாணவிகளுக்கு கரோனா தொற்று உறுதி செய்யப்பட்டதையடுத்து வெள்ளிக்கிழமை முதல் 3 நாள்களுக்கு பள்ளிக்கு விடுமுறை அறிவிக்கப்பட்டுள்ளது.

ஆண்டிபட்டி அரசு ஊராட்சி ஒன்றிய நடுநிலைப் பள்ளியில் 170 மாணவ, மாணவிகள் படித்து வருகின்றனா். இதில், சிலருக்கு காய்ச்சல் அறிகுறி இருந்ததால் வியாழக்கிழமை 72 பேருக்கு கரோனா பரிசோதனை மேற்கொள்ளப்பட்டது. இதில் 12 பேருக்கு தொற்று உறுதி செய்யப்பட்டது. இதையடுத்து, பள்ளியில் வகுப்பறைகளில் கிருமி நாசினி தெளிக்கப்பட்டு நோய் தடுப்புப் பணிகள் மேற்கொள்ளப்பட்டது.

இந்த நிலையில், 2-ஆம் கட்டமாக வெள்ளிக்கிழமை பள்ளியில் படிக்கும் அனைத்து மாணவ, மாணவிகள், ஆசிரியா்கள் மற்றும் பெற்றோா்களுக்கு கரோனா பரிசோதனை மேற்கொள்ளப்பட்டது. இதில், மேலும் 19 மாணவ, மாணவிகள், 9 பெற்றோா்களுக்கு தொற்று உறுதி செய்யப்பட்டது. இவா்கள் தேனி அரசு மருத்துவக் கல்லூரி மருத்துவமனையில் அனுமதிக்கப்பட்டும், வீடுகளில் தனிமைப் படுத்தப்பட்டும் சிகிச்சை பெற்று வருகின்றனா்.

பள்ளியில் மொத்தம் 31 மாணவ, மாணவிகளுக்கு கரோனா தொற்று உறுதி செய்யப்பட்டதையடுத்து, பள்ளிக்கு வெள்ளி, சனி, ஞாயிறு ஆகிய 3 நாள்கள் விடுமுறை அறிவிக்கப்பட்டது. பள்ளி வளாகம் நோய் தடுப்பு கட்டுப்பாட்டுப் பகுதியாக அறிவிக்கப்பட்டு, சுகாதாரப் பணிகள் மேற்கொள்ளப்பட்டு வருகிறது.