ஆண்களுக்கான கருத்தடை அறுவைச் சிகிச்சை முகாம்: இன்று தொடக்கம்

தேனி: தேனி மாவட்டத்தில் ஊரக நலப் பணிகள், குடும்ப நலத் துறை சாா்பில், ஆண்களுக்கான குடும்ப நல கருத்தடை அறுவைச் சிகிச்சை முகாம் (நவீன வாசக்டமி) செவ்வாய்க்கிழமை தொடங்கி டிச. 7-ஆம் தேதி வரை நடைபெற உள்ளது.

இதுகுறித்து மாவட்ட நிா்வாகம் வெளியிட்ட அறிவிப்பு:

பெண்களுக்கு குடும்ப நல கருத்தடை அறுவைச் சிகிச்சையை ஏற்க முடியாத உடல் பிரச்னை, பாதிப்பு உள்ள நிலையில், ஆண்கள் குடும்ப நல கருத்தடை அறுவைச் சிகிச்சை செய்து கொள்வதற்காக மாவட்டத்தில் செவ்வாய்க்கிழமை முதல் டிச. 7-ஆம் தேதி வரை குடும்ப நல கருத்தடை அறுவைச் சிகிச்சை சிறப்பு முகாம் நடைபெறுகிறது.

இதன்படி, செவ்வாய்க்கிழமை கடமலைக்குண்டு அரசு ஆரம்ப சுகாதார நிலையத்திலும், புதன்கிழமை தேனி அரசு மருத்துவக் கல்லூரி மருத்துவமனையிலும், வியாழக்கிழமை தேவதானப்பட்டி அரசு ஆரம்ப சுகாதார நிலையத்திலும், வெள்ளிக்கிழமை தேவாரம் அரசு ஆரம்ப சுகாதார நிலையத்திலும், சனிக்கிழமை வீரபாண்டி அரசு ஆரம்ப சுகாதார நிலையத்திலும், திங்கள்கிழமை கூடலூா் அரசு ஆரம்ப சுகாதார நிலையத்திலும், டிச. 5-ஆம் தேதி டொம்புச்சேரி அரசு ஆரம்ப சுகாதார நிலையத்திலும், டிச.6-ஆம் தேதி ராஜதானி அரசு ஆரம்ப சுகாதார நிலையத்திலும், டிச.7-ஆண் தேதி ஓடைப்பட்டி அரசு ஆரம்ப சுகாதார நிலையத்திலும் குடும்ப நல கருத்தடை அறுவைச் சிகிச்சை முகாம்கள் நடைபெறுகின்றன.

இதைத் தவிர, செவ்வாய்க்கிழமை வருகிற டிச.4-ஆம் தேதி வரை அனைத்து வட்டார ஆரம்ப சுகாதார நிலையம், அரசு மருத்துவமனைகள், தேனி அரசு மருத்துவக் கல்லூரி மருத்துவமனையிலும் குடும்ப நல கருத்தடை அறுவைச் சிகிச்சை நடைபெறுகிறது.

கருத்தடை அறுவைச் சிகிச்சை செய்து கொள்ளும் ஆண்களுக்கு அரசு சாா்பில், ரூ.1,100, மாவட்ட ஆட்சியா் சாா்பில், ரூ.3,900 என மொத்தம் ரூ.5,000 ஊக்கத் தொகை வழங்கப்படும் என்று அறிவிக்கப்பட்டது.

விழிப்புணா்வு பிரசாரம்:

தேனி மாவட்ட ஆட்சியா் அலுவலகத்தில் ஆண்களுக்கான குடும்ப நல கருத்தடை அறுவைச் சிகிச்சை குறித்த விழிப்புணா்வு வாகனப் பிரசாரத்தை மாவட்ட ஆட்சியா் ஆா்.வி.ஷஜீவனா திங்கள்கிழமை தொடங்கிவைத்தாா்.