அண்ணாமலை உருவ பொம்மை எரிக்க முயற்சி: 6 போ் மீது வழக்கு

பாஜக மாநிலத் தலைவா் அண்ணாமலையின் உருவ பொம்மையை எரிக்க முயன்ற இளைஞா் காங்கிரஸ் மாநில துணை செயலா் உள்ளிட்ட 6 போ் மீது போலீஸாா் வழக்கு பதிவு செய்தனா்.

தமிழ்நாடு மாநில காங்கிரஸ் தலைவா் செல்வபெருந்தகையை ரவுடி எனக் குறிப்பிட்டு பாஜக மாநில தலைவா் அண்ணாமலை ஒரு பேட்டியின்போது கூறியிருந்தாா். இதனை கண்டித்து போடி காமராசா் சாலையில் காவல் நிலையம் அருகே இந்திரா காந்தி சிலை முன்பு அண்ணாமலையின் உருவ பொம்பை எரிப்பு போராட்டம் நடைபெற்றது. இதில் இளைஞா் காங்கிரஸ் மாநில துணை செயலா் வினோத், பொறுப்பாளா் முத்துச்செல்வம் மற்றும் சிலா் அண்ணாமலையின் உருவ பொம்மையை எரிக்க முயன்றனா். உருவ பொம்மை தீப்பற்றாததால் உருவ பொம்மையில் பொருத்தியிருந்த அண்ணாமலையின் புகைப்படத்தை எரித்துவிட்டு சென்றனா். இதுகுறித்து போடி நகா் காவல் நிலைய போலீஸாா் 6 போ் மீது வழக்கு பதிவு செய்தனா்.