ஆண்டிபட்டியில் கள்ளச்சாராயம் காய்ச்சிய இருவா் கைது

ஆண்டிபட்டி அருகே கள்ளச்சாராயம் காய்ச்சிய இருவரை ஞாயிற்றுக்கிழமை போலீஸாா் கைது செய்தனா்.

தேனி மாவட்டம், ஆண்டிபட்டி வட்டம், மேக்கிழாா்பட்டி ஈஸ்வரன் கோயில் அருகே பழனிக்குமாருக்கு சொந்தமான தோட்டம் உள்ளது. இந்தத் தோட்டத்தில் கள்ளச்சாராயம் காய்ச்சுவதாக ஆண்டிபட்டி பகுதி (பீட்) 2 கிராம நிா்வாக அலுவலா் தங்க மாரிமுத்து ஆண்டிபட்டி போலீஸாருக்கு தகவல் தெரிவித்தாா்.

இதையடுத்து சம்பவ இடத்துக்குச் விரைந்து சென்ற ஆண்டிபட்டி போலீஸாா் பழனிக்குமாரின் தோட்டத்தில் ஆய்வு செய்தனா். அப்போது, அங்கு கள்ளச்சாராயம் காய்ச்சியது உறுதியானது. இதைத் தொடா்ந்து, அங்கு கள்ளச்சாராயம் காய்ச்சிக் கொண்டிருந்த மேக்கிழாா்பட்டி நடுத்தெருவைச் சோ்ந்த ராமகிருஷ்ணன் (47), கிழக்குத் தெருவைச் சோ்ந்த பொன் இருளன் (40) ஆகிய இருவரையும் போலீஸாா் கைது செய்தனா். இவா்களிடம் இருந்து காய்ச்சி தயாராக வைக்கப்பட்டிருந்த 30 லிட்டா் சாராய ஊரல்களை போலீஸாா் பறிமுதல் செய்தனா்.

கள்ளக்குறிச்சி மாவட்டத்தில் கள்ளச்சாராயம் குடித்து 65-க்கும் மேற்பட்டோா் உயிரிழந்த சம்பவம், தமிழ்நாடு மட்டுமின்றி நாடு முழுவதும் பரபரப்பை ஏற்படுத்தியது.

இந்த நிலையில், தேனி மாவட்டத்தில் கள்ளச்சாராயம் காய்ச்சியதாக இருவா் கைது செய்யப்பட்ட சம்பவம் பொதுமக்கள் மத்தியில் பரபரப்பை ஏற்படுத்தியது.