ஸ்ரீவில்லிபுத்தூர் அருகே மணல் திருட்டு: லாரி, 3 டிராக்டர்கள் பறிமுதல்

ஸ்ரீவில்லிபுத்தூர் அருகே மணல் திருட்டில் ஈடுபட்ட இருவரை கைது செய்த போலீஸார், லாரி, 3 டிராக்டர்களை  பறிமுதல் செய்தனர்.
    நத்தம்பட்டி காவல் நிலைய சார்பு ஆய்வாளர் சந்தோஷ், புதன்கிழமை இரவு அழகாபுரி அருகே தேசிய நெடுஞ்சாலையில், வாகன தணிக்கையில் ஈடுபட்டிருந்தார். அப்போதுஅவ்வழியாக மணல் ஏற்றி வந்த லாரியை வழிமறித்து போலீஸார் சோதனை நடத்தினர். விசாரணையில் அனுமதியின்றி மணல் ஏற்றி வந்தது தெரிந்தது. போலீஸார் வழக்குப் பதிவு செய்து, லாரியை ஓட்டி வந்த திண்டுக்கல், குருநகர், தர்மர் மகன் பாண்டியராஜா (40) மற்றும் மாற்று ஓட்டுநர் ஸ்ரீரங்கம், சின்ன ஆலம்பட்டியைச் சேர்ந்த ராமசாமி மகன் நாராயணசாமி (29) ஆகியோரை கைது செய்து, லாரியை பறிமுதல் செய்தனர்.
மம்சாபுரம்: மம்சாபுரம், காவல் சார்பு ஆய்வாளர் கந்தகிருஷ்ணன், புதன்கிழமை ராக்காச்சியம்மன்கோயில் ஆற்றுப் பகுதியில் வாகன தணிக்கையில் ஈடுபட்டிருந்தார். அப்போது அவ்வழியாக டிராக்டரை நிறுத்தி நடத்திய சோதனையில், அனுமதியின்றி மணல் ஏற்றி வந்தது தெரிந்தது. இதனையடுத்து போலீஸார் டிராக்டர் உரிமையாளர் ராஜபாளையம், சோமையாபுரத்தைச் சேர்ந்த  பொன்னையா மகன் லிங்கராஜ் மற்றும் ஓட்டுநர் சீத்தாராமன் ஆகியோர் மீது வழக்குப் பதிவு செய்து விசாரித்து வருகின்றனர். டிராக்டரை போலீஸார் பறிமுதல் செய்தனர்.
     இதே பகுதியில் மற்றொரு டிராக்டரிலும் போலீஸார் நடத்திய சோதனையில் மணல் திருட்டில் ஈடுபட்டது தெரியவந்தது. இதனையடுத்து போலீஸார் டிராக்டர் உரிமையாளர் சோமையாபுரம் மாரியப்பன் மகன் பால்பாண்டி, ஓட்டுநர் வைரமுத்து ஆகியோர் மீது வழக்குப் பதிவு செய்து விசாரித்து வருகின்றனர். டிராக்டரை போலீஸார் பறிமுதல் செய்தனர்.
ஸ்ரீவில்லிபுத்தூர்: ஸ்ரீவில்லிபுத்தூர் நகர் காவல் நிலைய சார்பு ஆய்வாளர் அய்யணன், புதன்கிழமை திருவண்ணாமலை சாலையில் வாகன தணிக்கையில் ஈடுபட்டிருந்தார். 
  அப்போது போலீஸாரை கண்டதும் மணல் ஏற்றி வந்த டிராக்டரை நிறுத்திவிட்டு ஓட்டுநர் தப்பினார். அதில் அனுமதியின்றி மணல் திருடி வந்தது தெரியவந்தது. போலீஸார் டிராக்டரை பறிமுதல் செய்து ஓட்டுநரை தேடி வருகின்றனர்.