ஏழாயிரம்பண்ணை, வெம்பக்கோட்டை  பகுதியில் மின்வெட்டு: பொதுமக்கள் அவதி

ஏழாயிரம்பண் ணை, வெம்பக்கோட்டை பகுதியில் அடிக்கடி ஏற்படும் மின்வெட்டு காரணமாக பொதுமக்கள், பள்ளி மாணவ, மாணவிகள் மிகுந்த சிரமத்தை சந்தித்து வருகின்றனர்.
விருதுநகர் மாவட்டம் சாத்தூர் அருகே ஏழாயிரம்பண்ணை, வெம்பக்கோட்டை, மஞ்சள்ஒடைப்பட்டி, முத்தாண்டியாபுரம், ரெட்டியபட்டி உள்ளிட்ட பகுதிகளில் கடந்த சில தினங்களாக தொடர் மின்வெட்டு இருந்து வருகிறது. இதனால் இப்பகுதியில் வசிப்பவர்கள் மிகுந்த சிரமத்தை சந்தித்து வருகின்றனர். மேலும் எந்தவித முன்அறிவிப்பும் இன்றி அடிக்கடி மின்வெட்டு ஏற்படுவதாக இப்பகுதியினர் குற்றம் சாட்டுகின்றனர். எப்போதும் சுமார் ஒரு மணி நேரம் வழக்கமாக மின்சாரம் தடைபடும். ஆனால் தற்போது ஒரு நாளைக்கு 4 முதல் 6 மணி நேரம் மின்சாரம் நிறுத்தப்படுகிறது. இதனால் இப்பகுதியினர் இரவு நேரத்தில் தூக்கம் இல்லாமல் மிகுந்த சிரமத்தை சந்தித்து வருகின்றனர்.
 மேலும் தற்போது காலாண்டு தேர்வு தொடங்கியுள்ளதால் பள்ளி மாணவ, மாணவிகள் இரவு நேரத்தில் படிப்பதற்கு கூட மிகுந்த சிரமத்தை சந்தித்து வருகின்றனர்.  எனவே பள்ளி மாணவ, மாணவிகள் நலன் கருதி இப் பகுதியில் ஏற்படும் தொடர் மின்வெட்டை தடுக்க நடவடிக்கை எடுக்க வேண்டும் இப்பகுதி பொது மக்கள் கோரிக்கை விடுத்துள்ளனர்.
இது குறித்து மின் வாரிய அதிகாரிகள் கூறுகையில், தற்போது ஏழாயிரம்பண்ணை உள்ளிட்ட பகுதிகளில் மின்வெட்டு உள்ளது. இதுகுறித்து ஆய்வு செய்து முறையான நடவடிக்கை எடுக்கப்படும் என தெரிவித்தனர்.