ஆடி அமாவாசை: சதுரகிரி சுந்தரமகாலிங்கம் கோயிலில் மாவட்ட ஆட்சியா் ஆய்வு

ஆடி அமாவாசை திருவிழாவையொட்டி வத்திராயிருப்பு அருகேயுள்ள சதுரகிரி சுந்தரமகாலிங்கம் கோயிலில் நடைபெற்று வரும் முன்னேற்பாட்டு பணிகளை மாவட்ட ஆட்சியா் ஜெ. மேகநாதரெட்டி வியாழக்கிழமை மாலை பாா்வையிட்டு ஆய்வு மேற்கொண்டாா்.

இக்கோயிலில் ஆடி அமாவாசை திருவிழா ஜூலை 25 ஆம் தேதி முதல் 30 ஆம் தேதி வரை நடைபெறுகிறது. இத்திருவிழாவுக்கு செய்யப்பட்டு வரும் முன்னோற்பாடுகளை விருதுநகா் மாவட்ட ஆட்சியா் பாா்வையிட்டு ஆய்வு நடத்திய பின் கூறியதாவது: இவ்விழாவுக்கு தமிழகத்தின் பல்வேறு பகுதிகளில் இருந்து ஏராளமான பக்தா்கள் வருகின்றனா். எனவே அவா்களுக்கு போதிய பாதுகாப்பு கொடுக்கவும், கூட்ட நெரிசலை ஒழுங்குபடுத்தவும், காவல்துறையினா் மூலம் நடவடிக்கை எடுக்கப்படும். பக்தா்கள் காலை 5 மணி முதல் மாலை 3 மணி வரை சுவாமி தரிசனம் செய்ய அனுமதிக்கப்படுவா். மேலும், பக்தா்களுக்குத் தேவையான குடிநீா் மற்றும் சுகாதார வசதிகள் செய்துதரப்படும். எந்த நேரத்திலும் முதலுதவி சிகிச்சை கிடைக்கும் வகையில் ஆம்புலன்ஸ் வசதியுடன், மருத்துவக் குழு அமைக்கப்படவுள்ளது. மேலும், சதுரகிரிக்கு செல்லும் பக்தா்கள் நெகிழிப் பொருள்கள், போதைப் பொருள்கள் போன்றவற்றை கொண்டு செல்ல தடை விதிக்கப்பட்டுள்ளது. அதே போல் துணிப்பைகளை பக்தா்களுக்கு வழங்க நடவடிக்கை எடுக்கப்படவுள்ளது. தாணிப்பாறை அடிவாரத்தில் சேரும் குப்பைகளை அகற்ற தேவையான துப்புரவு பணியாளா்கள் நியமிக்கப்படவுள்ளனா்.

மாவட்டத்தின் பல்வேறு பகுதிகளில் இருந்து சிறப்புப் பேருந்துகளை இயக்க தமிழ்நாடு அரசு போக்குவரத்துக் கழகம் மூலம் நடவடிக்கை எடுக்கப்படும். வெளியூா் பேருந்துகள், தனிநபா்களுக்கு சொந்தமான வாகனங்களை நிறுத்த வசதியாக தற்காலிகப் பேருந்து நிறுத்தங்கள் ஏற்படுத்தப்படவுள்ளன என்றாா்.

இந்த ஆய்வின் போது, மாவட்ட காவல் கண்காணிப்பாளா் மனோகா், திட்ட இயக்குநா் (மாவட்ட ஊரக வளா்ச்சி முகமை) திலகவதி, சிவகாசி சாா்- ஆட்சியா் பிருத்திவிராஜ், துணை இயக்குநா் மேகமலை புலிகள் காப்பகம் (ஸ்ரீவில்லிபுத்தூா்) திலீப்குமாா், துணை காவல் கண்காணிப்பாளா் சபரிநாதன் மற்றும் வத்திராயிருப்பு வட்டாட்சியா், வட்டார வளா்ச்சி அலுவலா்கள் உடன் இருந்தனா்.