பழனி தேவஸ்தானம் ரூ. 6.5 கோடி வரி பாக்கி: நகா்மன்றத் தலைவா் புகாா்

நகராட்சிக்கு பழனி தேவஸ்தானம் ரூ. 6.5 கோடி வரி பாக்கி வைத்திருப்பதாக அமைச்சா் கே.என். நேருவிடம், நகா்மன்றத் தலைவா் கே. உமாமகேஸ்வரி புகாா் தெரிவித்தாா்.

திண்டுக்கல் மற்றும் தேனி மாவட்டங்களிலுள்ள நகா்ப்புற உள்ளாட்சி அமைப்புகளில் மேற்கொள்ளப்பட்டு வரும் வளா்ச்சிப் பணிகள் குறித்த ஆய்வுக் கூட்டம் திண்டுக்கல் மாவட்ட ஆட்சியா் அலுவலக கூட்ட அரங்கில் சனிக்கிழமை நடைபெற்றது. இதற்கு, மாவட்ட ஆட்சியா் ச. விசாகன் தலைமை வகித்தாா். கூட்டுறவுத்துறை அமைச்சா் ஐ. பெரியசாமி, உணவுத்துறை அமைச்சா் அர. சக்கரபாணி ஆகியோா் முன்னிலை வகித்தனா். சிறப்பு அழைப்பாளராக நகராட்சி நிா்வாகத் துறை அமைச்சா் கே.என். நேரு கலந்து கொண்டாா்.

இதில் உள்ளாட்சி அமைப்புகளின் தலைவா்கள் பேசினா்.

பழனி நகராட்சித் தலைவா் கே. உமாமகேஸ்வரி: நகராட்சியில் வசிக்கும் பொதுமக்களுக்கு மட்டுமின்றி, பழனிக்கு வரும் பக்தா்களுக்கும் தேவையான அனைத்து அடிப்படை வசதிகள் நிறைவேற்றிக் கொடுக்கப்படுகின்றன. ஆனால், பழனி தேவஸ்தானம் சாா்பில் நகராட்சியின் வளா்ச்சிக்கு எவ்வித உதவிகளும் செய்வதில்லை. மேலும், பழனி தேவஸ்தானம் சாா்பில், நகராட்சிக்கு செலுத்த வேண்டிய சொத்து வரி மற்றும் திருவிழாக்கால வரி என ரூ. 6.5 கோடி நிலுவையில் உள்ளது. 5 முக்கியத் திருவிழாக்கள் நடைபெற்று வரும் நிலையில் தைப்பூசம் மற்றும் பங்குனி உத்திரம் 2 திருவிழாக்களுக்கு மட்டுமே வரி செலுத்துகின்றனா்.

குடிநீா் விநியோகிக்கும் பணிகளை அறநிலையத்துறையினா், தங்கள் கட்டுப்பாட்டில் எடுத்துவிட்டனா். சுங்கக் கட்டணம் மூலம் ரூ. 1.50 கோடி நகராட்சிக்கு வருவாய் கிடைத்து வருகிறது. பழனியில் போக்குவரத்து நெரிசலுக்கு தீா்வு காணும் வகையில் வெளிச்சுற்றுச் சாலை வசதி ஏற்படுத்த வேண்டும். நகராட்சியில் பணியாளா்கள் பற்றாக்குறை அதிகமாக உள்ளது என்றாா்.

இதற்கு பதிலளித்து அமைச்சா் கே.என். நேரு கூறியது: குடிநீா் விநியோகத்திற்கு அறநிலைத்துறையினா் தனியாக அனுமதிப் பெற்று செயல்படுத்தி வருகின்றனா். நிலுவையிலுள்ள வரிப்பணத்தை செலுத்த உரிய நடவடிக்கை எடுக்கப்படும். அதேபோல் வெளிச்சுற்றுச் சாலை அமைப்பது குறித்தும் ஆலோசிக்கப்படும். பணியாளா் பற்றாக்குறைக்கு விரைவில் தீா்வு காணப்படும் என்றாா்.

கொடைக்கானல் நகராட்சித் தலைவா் செல்லத்துரை: கொடைக்கானல் நகராட்சிப் பகுதிகளில் சாலைகள் அமைக்கும்போது, தடுப்புச் சுவா்கள் அமைக்கப்பட வேண்டியது அவசியம். சொத்து வரி உயா்த்தப்பட்டதன் மூலம், நகராட்சிக்கு ரூ.4 கோடி கூடுதலாக கிடைக்கும். படகு குழாம் மூலம் அடுத்த ஆண்டு முதல் ரூ.3 கோடி கூடுதல் வருவாய் கிடைக்கும் என்றாா்.

அமைச்சா் கே.என். நேரு கூறுகையில், ஊட்டியில் 1,700 கடைகளை ஏலம் விடுவதன் மூலம் நகராட்சிக்கு ரூ.3 கோடி மட்டும் வருவாய் கிடைத்து வந்தது. அதனை ரூ.12 கோடியாக உயா்த்தும் நோக்கில் ஏலத்தொகையை கூடுதலாக நிா்ணயம் செய்தோம். வியாபாரிகள் நீதிமன்றத்தை அணுகினா். அதன் பின்னா் நடைபெற்ற ஏலத்தில், ரூ.35 கோடி வருவாய் கிடைத்தது. அதனை பின்பற்றியே, தஞ்சாவூா், திருநெல்வேலி உள்ளிட்ட மாநகராட்சிகளிலும் ஏலம் நடத்தப்பட்டுள்ளது. நகராட்சிக் கடைகளை ரூ.11ஆயிரத்திற்கு ஏலம் எடுத்து, ரூ.1.15 லட்சத்திற்கு வாடகைக்கு விடுகின்றனா். இதனால் நகராட்சிக்கு இழப்பு ஏற்படுவதை தடுக்க அதிகாரிகள் கவனம் செலுத்த வேண்டும். கொடைக்கானலில் 998 தரைக் கடைகள் உள்ள நிலையில், ஊட்டி நகராட்சிக்கு இணையாக உபரி வருவாய் கிடைப்பதற்கான நடவடிக்கைகளை மேற்கொள்ள வேண்டும் என்றாா்.