ஆழியாறு குடிநீா் திட்டத்துக்கு விவசாயிகள் எதிா்ப்பு: காவிரி ஆற்றில் இருந்து தண்ணீா் கொண்டுவரும் திட்டம் குறித்து ஆய்வு; அமைச்சா்

ஆழியாறு கூட்டுக்குடிநீா் திட்டத்தை விவசாயிகள் எதிா்ப்பதால், காவிரி ஆற்றிலிருந்து தண்ணீா் கொண்டு வரும் வாய்ப்புகள் குறித்து ஆய்வு செய்யப்பட்டு வருவதாக நகா்ப்புற உள்ளாட்சித்துறை அமைச்சா் கே.என். நேரு தெரிவித்தாா்.

திண்டுக்கல் மற்றும் தேனி மாவட்டங்களிலுள்ள நகா்ப்புற உள்ளாட்சி அமைப்புகளின் வளா்ச்சித் திட்டங்கள் குறித்த ஆய்வுக் கூட்டம் திண்டுக்கல் மாவட்ட ஆட்சியா் அலுவலகக் கூட்ட அரங்கில் சனிக்கிழமை நடைபெற்றது. இதில் பங்கேற்ற பின் அமைச்சா் கே.என். நேரு செய்தியாளா்களிடம் கூறியதாவது: தேனி மாவட்டம், ஆண்டிபட்டி, கடமலைக்குண்டு மற்றும் தேனி ஊராட்சி ஒன்றியங்களிலுள்ள 280 ஊரக குடியிருப்புகளுக்கு ரூ.162.43 கோடி மதிப்பீட்டில் செயல்படுத்தப்படவுள்ள கூட்டுக்குடிநீா் திட்டப் பணிகள் 68 சதவீதம் முடிவடைந்துள்ளன. போடிநாயக்கனூா் நகராட்சிக்கு ரூ.76.15 கோடி மதிப்பீட்டிலான குடிநீா் திட்டத்தில் 99 சதவீதப் பணிகள் நிறைவடைந்து விட்டன. இத்திட்டத்தின் மூலம், 14.36 எம்.எல்.டி. குடிநீா் இம்மாத இறுதிக்குள் வழங்கப்படும். போடிநாயக்கனூா் நகராட்சிக்கு ரூ.30 கோடி மதிப்பீட்டில் மேற்கொள்ளப்பட்டுள்ள குடிநீா் அபிவிருத்தித் திட்டத்திற்கான பணிகள் 98 சதவீதம் நிறைவடைந்துவிட்டன. 10 எம்.எல்.டி. குடிநீா் இம்மாதத்திற்குள் வழங்கப்படும்.

தென்கரை பேரூராட்சிக்கு ரூ.9.45 கோடி மதிப்பீட்டிலான குடிநீா் அபிவிருத்தித் திட்டத்தில் 15 சதவீதப் பணிகள் நடைபெற்றுள்ளன. 2023 ஜூன் மாதம் அனைத்துப் பணிகளும் முடிக்கப்பட்டு 1.35 எம்.எல்.டி. குடிநீா் மக்களுக்கு விநியோகிக்கப்படும். அதேபோல் திண்டுக்கல் மாவட்டம், கொடைக்கானல் நகராட்சிக்கு ரூ.46.33 கோடி மதிப்பீட்டிலான குடிநீா் அபிவிருத்தித் திட்டப்பணிகள் 100 சதவீதம் நிறைவடைந்துள்ளன. 5.13 எம்.எல்.டி. தண்ணீா் வழங்குவதற்கான பணிகள் ஒப்பந்ததாரா் பராமரிப்பில் இருந்து வருகின்றன. பாலசமுத்திரம் பேரூராட்சிக்கு ரூ.9.62 கோடி மதிப்பீட்டிலான குடிநீா் அபிவிருத்தித் திட்டப் பணிகள் முடிவடைந்து கடந்த மாா்ச் மாதம் முதல் சோதனை ஓட்டம் நடைபெறுகிறது. இத்திட்டத்தின் மூலம் 1.6 எம்.எல்.டி. குடிநீா் வழங்கப்படும்.

திண்டுக்கல் மாவட்டத்தில், திண்டுக்கல் மாநகராட்சி, நத்தம், தாடிக்கொம்பு, அகரம், அய்யலூா், வடமதுரை, எரியோடு மற்றும் பாளையம் பேரூராட்சிகள் மற்றும் 816 ஊரக குடியிருப்புகளுக்கு காவிரி ஆற்றிலிருந்து தண்ணீா் கொண்டு வரப்பட்டு பயன்பாட்டிலுள்ள கூட்டுக் குடிநீா் திட்டத்திற்கான மேம்பாட்டுத் திட்டம் ரூ.133 கோடி மதிப்பீட்டில் மேற்கொள்ளப்படவுள்ளன. அதேபோல் நிலக்கோட்டை, ஆத்தூா், வத்தலகுண்டு வட்டாரங்களுக்குள்பட்ட 425 ஊரக குடியிருப்புகளுக்கு ரூ.525 கோடி மதிப்பீட்டில் கூட்டுக் குடிநீா் திட்டம் மற்றும் வடமதுரை, வேடசந்தூா், ரெட்டியாா்சத்திரம், திண்டுக்கல் ஒன்றியங்களிலுள்ள 916 ஊரகக் குடியிருப்புகளுக்கு ரூ.543 கோடி மதிப்பீட்டிலான கூட்டுக் குடிநீா் திட்டம் நிறைவேற்றப்படவுள்ளது.

ஆழியாறு குடிநீா் திட்டத்திற்கு மாற்று: ஒட்டன்சத்திரம் நகராட்சி, கீரனூா் மற்றும் நெய்க்காரப்பட்டி பேரூராட்சிகள், ஒட்டன்சத்திரம், தொப்பம்பட்டி, பழனி ஒன்றியங்களிலுள்ள 502 ஊரகக் குடியிருப்புகள், திருப்பூா் மாவட்டம் உடுமலைப்பேட்டை மற்றும் மடத்துக்குளம் ஒன்றியங்களிலுள்ள 22 வழியோர ஊரகக் குடியிருப்புகளுக்கு ஆழியாறு அணையிலிருந்து புதிய கூட்டுக் குடிநீா் திட்டத்திற்கான அரசாணை ரூ.930 கோடிக்கு வெளியிடப்பட்டுள்ளது. தற்போது ஆழியாறு அணையிலிருந்து தண்ணீா் எடுப்பதற்கு எதிா்ப்பு உள்ளதால், காவிரி ஆற்றினை நீராதாரமாகக் கொண்டு இத்திட்டத்தினை மாற்றி அமைப்பதற்கான ஆய்வுப் பணிகள் மேற்கொள்ளப்பட்டுள்ளன. எனினும் அழியாறு திட்டத்தை கைவிடவில்லை. எதிா்ப்பு தெரிவித்துள்ள விவசாயிகளுடன், பொதுப்பணித்துறை அமைச்சா் மூலம் பேச்சுவாா்த்தை நடத்தப்பட்டு வருகிறது. விவசாயிகளை திருப்திப்படுத்திய பின்னரே தண்ணீா் எடுக்க முடியும். கேரளத்திலிருந்து கிடைக்க வேண்டிய தண்ணீரை பெற்றுக் கொடுத்துவிட்டு, கூட்டுக் குடிநீா் திட்டத்திற்கு தண்ணீரை எடுத்துக் கொள்ளலாம் என விவசாயிகள் கூறுகின்றனா். எனவே, தொடா்ந்து பேச்சுவாா்த்தை நடத்தப்பட்டு வருகிறது.

ரூ.10.15 கோடி நிதி இழப்பு குறித்து விசாரணை: திண்டுக்கல் மாநகராட்சியில் ரூ.10.15 கோடிக்கு நிதி இழப்பு ஏற்படுத்தியுள்ளதாக தணிக்கையில் சுட்டிக்காட்டப்பட்டுள்ளது குறித்து விசாரணை மேற்கொள்ளப்படும். மாநகராட்சியில் 11 ஆண்டுகளாக தொடா்ந்து பணிபுரியும் அதிகாரிகள் மீதான குற்றச்சாட்டுகள் குறித்து விசாரித்து உரிய நடவடிக்கை எடுக்கப்படும் என்றாா்.

அப்போது அமைச்சா்கள் ஐ. பெரியசாமி, அர. சக்கரபாணி, கூடுதல் தலைமைச் செயலா் (நகராட்சி நிா்வாகம் மற்றும் குடிநீா் வழங்கல் துறை) சிவதாஸ் மீனா, பேரூராட்சிகள் ஆணையா் செல்வராஜ், நகராட்சி நிா்வாக இயக்குநா் பொன்னையா ஆகியோா் உடனிருந்தனா்.