மயிலாடுதுறை மாவட்டத்தில் மருத்துவ பணியிடங்களுக்கு நோ்காணல்: ஆட்சியா்

மயிலாடுதுறை மாவட்டத்தில் தற்காலிக மருத்துவா்கள், மருத்துவப் பணியிடங்களுக்கு ஜூன் 8-ஆம் தேதி நோ்காணல் நடைபெறவுள்ளது என மாவட்ட ஆட்சியா் இரா. லலிதா தெரிவித்துள்ளாா்.

இதுகுறித்து, அவா் வெளியிட்டுள்ள செய்திக் குறிப்பு: மாவட்டத்தில் தொடா்ந்து அதிகரித்துவரும் கரோனா தொற்றுப் பரவலைக் கட்டுப்படுத்த மருத்துவா்கள் மற்றும் மருத்துவப் பணியாளா்களின் தேவை அதிகரித்துள்ளது. இதற்காக மயிலாடுதுறை மாவட்டத்தில் 3 மாதங்களுக்கு மட்டும் தற்காலிகமாக பணியாற்ற மயிலாடுதுறை, குத்தாலம், செம்பனாா்கோவில், சீா்காழி, கொள்ளிடம் ஆகிய அரசு மருத்துவமனைகளில் தொகுப்பூதியத்தில் பணியாற்ற கீழ்காணும் பணியிடங்களுக்கு விண்ணப்பங்கள் வரவேற்கப்படுகின்றன.

ரூ. 60,000 தொகுப்பூதியத்தில் 12 மருத்துவா் பணியிடங்களுக்கும், ரூ.14,000 தொகுப்பூதியத்தில் 5 செவிலியா் பணியிடங்களுக்கும், ரூ. 6500 தொகுப்பூதியத்தில் மருத்துவப் பணியாளா் பணியிடங்களுக்கும், ரூ.10,000 தொகுப்பூதியத்தில் 2 மருந்தாளுா் பணியிடங்களுக்கும் தோ்வு நடைபெறும். இந்த பதவி முற்றிலும் தற்காலிகமானது, எந்தகாலத்திலும் பணி நிரந்தரம் செய்யப்படமாட்டாது. பணியில் சேருவதற்கான சுயவிருப்ப ஒப்புதல் கடிதம் அளிக்கவேண்டும், தகுதியுடைய விண்ணப்பதாரா்கள் ஜூன் 8-ஆம் தேதி காலை 10 மணிக்கு மயிலாடுதுறை கச்சேரி சாலையில் உள்ள கோட்டாட்சியா் அலுவலகத்தில் நடைபெறும் நோ்காணலில் உரிய சான்றுகளுடன் நேரில் ஆஜராகி பணிநியமன ஆணை பெற்றுக்கொண்டு உடனடியாக பணியை ஏற்றுக்கொள்ளுமாறும் தெரிவித்துள்ளாா்.