வாக்காளா் பட்டியலில் குளறுபடி: ஆட்சியா் அலுவலகம் முற்றுகை

வாக்காளா் பட்டியலில் குளறுபடி செய்யப்பட்டுள்ளதாகக் கூறி, பிரம்மதேசம் பகுதி பொதுமக்கள் விழுப்புரம் மாவட்ட ஆட்சியா் அலுவலகத்தை வியாழக்கிழமை முற்றுகையிட்டுப் போராட்டத்தில் ஈடுபட்டனா்.

விழுப்புரம் மாவட்டத்தில் ஊரக உள்ளாட்சித் தோ்தல் அக்.6, 9-ஆம் தேதிகளில் இரு கட்டங்களாக நடைபெறவுள்ளது. இதற்காக வேட்பாளா்கள் தற்போது தீவிர வாக்குச் சேகரிப்பில் ஈடுபட்டுள்ளனா். இதில், விக்கிரவாண்டி ஊராட்சி ஒன்றியம், 5-ஆது வாா்டு உறுப்பினா் பதவிக்கு, ஈச்சங்குப்பம் ஊராட்சி முருகன் கோவில் தெருவைச் சோ்ந்த மணி மனைவி செல்வி, அதிமுக சாா்பில் வேட்பாளராகப் போட்டியிடுகிறாா்.

இந்த நிலையில், செல்வி தலைமையில் 100-க்கும் மேற்பட்ட பொதுமக்கள் மாவட்ட ஆட்சியா் அலுவலகத்தை வியாழக்கிழமை காலையில் முற்றுகையிட்டுப் போராட்டத்தில் ஈடுபட்டனா். அப்போது, வேட்பாளா் செல்வி கூறியதாவது:

ஈச்சங்குப்பம், நேமூா், நந்திவாடி ஆகிய கிராம ஊராட்சிகளை உள்ளடக்கிய விக்கிரவாண்டி ஊராட்சி ஒன்றிய 5-ஆவது வாா்டு உறுப்பினா் பதவிக்கு அதிமுக சாா்பில் போட்டியிட்டு, தீவிர பிரசாரத்தில் ஈடுபட்டு வருகிறேன்.

இதற்கிடையே, இந்த வாா்டில் வாக்காளா் பட்டியலில் இருந்த தகுதியுடைய 40 பேரை பட்டியலில் இருந்து நீக்கிவிட்டு, தகுதியற்ற 18 வயது நிறைவடையாத, சென்னை உயா் நீதிமன்ற வழக்கு முடிவின்படி பெயா் நீக்கப்பட்டவா்களை புதிதாக வாக்காளா்களாகச் சோ்த்துள்ளனா். இதுபோல, முறைகேடாக 60 போ் வாக்காளா் பட்டியலில் இடம்பெற்றுள்ளனா்.

எனவே, நீக்கப்பட்ட 40 வாக்காளா்களை மீண்டும் வாக்காளா் பட்டியலில் சோ்க்க வேண்டும். முறைகேடாக சோ்க்கப்பட்ட 60 வாக்காளா்களை உடனடியாக நீக்க வேண்டும்.

கடந்த ஆக.31-ஆம் தேதி வெளியிடப்பட்ட திருத்தப்பட்ட வாக்காளா் பட்டியல் அடிப்படையில் தோ்தலை நடத்த வேண்டும். மேலும், நீதிமன்ற உத்தரவுகளை மீறி தகுதியற்றவா்களை வாக்காளா் பட்டியலில் சோ்த்த அதிகாரிகள் மீது கடும் நடவடிக்கை எடுக்க வேண்டும் என்றாா் அவா்.