வளா்ச்சித் திட்டப்பணிகள்: அமைச்சா் ஆலோசனை

நெடுங்காடு தொகுதியில் மேற்கொள்ள வேண்டிய வளா்ச்சித் திட்டப் பணிகள் குறித்து பல்வேறு துறை அதிகாரிகளுடன் அமைச்சா் சந்திர பிரியங்கா செவ்வாய்க்கிழமை ஆலோசனை நடத்தினாா்.

புதுவை போக்குவரத்துத் துறை அமைச்சா் சந்திர பிரியங்காவின் தொகுதியான நெடுங்காட்டில் மேற்கொள்ள வேண்டிய வளா்ச்சிப் பணிகள் குறித்த ஆலோசனைக் கூட்டத்தில் பல்வேறு அரசுத் துறையினா் கலந்துகொண்டனா்.

தொகுதியில் நடைபெறும் பல்வேறு திட்டப்பணிகள் குறித்து அதிகாரிகள் அமைச்சரிடம் விளக்கிக் கூறினா்.

அமைச்சா் பேசுகையில், வாய்க்கால்கள் தூா்வாரும் பணியை குறித்த காலத்திற்குள் முடிக்க சம்பந்தப்பட்ட துறையினா் கவனம் செலுத்தவேண்டும். குடிநீா் தொட்டிகள் இருக்குமிடங்களில் ஜெனரேட்டா் பழுதாகியிருந்தால் அதனை சீா்செய்து குடிநீா் விநியோகத்தில் குறைபாடு இல்லாமல் பாா்த்துக்கொள்ளவேண்டும்.

கிராமப்புறங்கள், வயல் வெளிகளில் தாழ்வாக செல்லும் மின் கம்பிகளை சீா்செய்யவேண்டும். அதுபோல மின் கம்பங்கள் இல்லாத பகுதிகளில் புதிதாக கம்பங்கள் நடவும், விளக்குகள் பொருத்தவேண்டும். 3 ஃபேஸ் இல்லாத பகுதிகளில் உரிய இணைப்பை தருவதோடு, எல்.இ.டி. விளக்குகள் பொருத்தவும் ஏற்பாடு செய்யவேண்டும்.

குப்பைகளை அவ்வப்போது அகற்ற கொம்யூன் பஞ்சாயத்து நிா்வாகம் ஏற்பாடு செய்யவேண்டும். கலைஞா் கருணாநிதி புறவழிச்சாலையில் மின் விளக்குகள் பொருத்தும் பணியை விரைந்து முடிக்கவேண்டும் என அதிகாரிகளுக்கு அறிவுறுத்தினாா்.

மாவட்ட துணை ஆட்சியா் எம். ஆதா்ஷ் (வருவாய்), பொதுப்பணித் துறை செயற்பொறியாளா்கள் கே. சந்திரசேகரன், கே.வீரசெல்வம், மின்துறை உதவிப் பொறியாளா் அனுராதா, நெடுங்காடு கொம்யூன் பஞ்சாயத்து ஆணையா் பாலன் மற்றும் பல அதிகாரிகள் கலந்துகொண்டனா்.