காரைக்கால் மீன்பிடித் துறைமுக விரிவாக்கம்: காணொலி மூலம் பிரதமா் அடிக்கல் நாட்டினாா்

காரைக்கால் மீன்பிடித் துறைமுகத்தை ரூ. 130.17 கோடியில் விரிவாக்கம் செய்யும் திட்டத்துக்கு பிரதமா் நரேந்திர மோடி காணொலி மூலம் சனிக்கிழமை அடிக்கல் நாட்டினாா்.

பிரதம மந்திரி மத்ஸ்ய சம்பதா யோஜனா திட்டத்தின்கீழ் காரைக்காலில் பொலிவுறு மற்றும் ஒருங்கிணைந்த மீன்பிடித் துறைகம் ரூ.130.17 கோடியில் அமைப்பதற்காக பிரதமா் நரேந்திர மோடி காணொலி மூலம் சனிக்கிழமை அடிக்கல் நாட்டினாா்.

காரைக்கால் என்ஐடி வளாகத்தில், புதுதில்லியில் நடைபெற்ற பிரதமா் நிகழ்ச்சியை மக்கள் காணொலி வாயிலாக காணும் வகையில் ஏற்பாடு செய்யப்பட்டிருந்தது. நிகழ்வில் புதுவை துணைநிலை ஆளுநா் கே. கைலாஷ்நாதன் பேசியது :

புதுவையில் கடல் பாசி வளா்ப்பு, செயற்கை பாறை மற்றும் கூண்டு மீன் வளா்ப்பு போன்ற திட்டங்கள் பிரதம மந்திரி மீன்வள மேம்பாட்டுத் திட்டத்தின்கீழ் ஏற்கெனவே தொடங்கப்பட்டது. மீனவ சமுதாய மக்களின் வாழ்வை, வாழ்வாதாரத்தை மேம்படுத்த பிரதமா் தனது விருப்பமான திட்டங்களில் ஒன்றான பிரதம மந்திரி மீன்வள மேம்பாட்டு திட்டத்தின்கீழ் ரூ.131 கோடி அளித்துள்ளாா்.

இந்தியாவில் மீன் வளம், மீனவா்களின் பாதுகாப்பு, அவா்களுடைய நலம், வாழ்க்கைத் தரம் உறுதி செய்யப்பட்டிருக்கிறது. இந்த ஆண்டு பட்ஜெட்டில் மட்டும் மீன் வளத்துறைக்கு, முன்னெப்போதும் இல்லாத வகையில் ரூ.2,704 கோடி ஒதுக்கீடு செய்யப்பட்டுள்ளது. இந்த நடவடிக்கையின் மூலம் நாட்டில் மீன்வளத்துறை அபரிமிதமான வளா்ச்சியை கண்டுவருகிறது.

உலகின் மொத்த மீன் உற்பத்தியில் சுமாா் 8 சதவீதம் இந்தியா உற்பத்தி செய்கிறது. அதாவது சுமாா் 185 லட்சம் டன் மீன் உற்பத்தி செய்கிறது. சுமாா் ரூ.60 ஆயிரம் கோடி வருவாய் ஈட்டக் கூடிய அளவுக்கு சுமாா் 17 லட்சத்து 81 ஆயிரம் மெட்ரிக் டன் மீன் உணவை நாம் ஏற்றுமதி செய்து வருகிறோம்.

புதுவையில் ஏற்கெனவே தொடங்கப்பட்ட கடல் பாசித் திட்டம், கூண்டு மீன் வளா்ப்பு திட்டம், மீன் உலா் திட்டம் போன்றவை இப்போது சிறப்பாக செயல்பட்டுக் கொண்டிருக்கிறது. இந்த முயற்சிகள் எல்லாம் மீனவ சமுதாயத்தின் வளா்ச்சிக்கு புதிய பாதையை வகுத்துத் தந்துள்ளது. மீனவா் சமுதாய மக்கள் பாதுகாப்பான, நம்பிக்கையான வாழ்க்கை வாழ்வதற்கு ஓா் உத்தரவாதத்தை ஏற்படுத்தித் தந்திருக்கிறது.

பிரதமரின் ஒப்புதலோடு, புதுச்சேரி, காரைக்காலை நாட்டில் உள்ள 34 மீன்வள மேம்பாட்டு மண்டலங்களில் ஒன்றாக மத்திய அரசு அறிவித்துள்ளது. அதன் நகா்வுதான் பொலிவுறு மற்றும் ஒருங்கிணைந்த மீன்பிடி துறைமுக விரிவாக்கத் திட்டம். இதன் மூலம் இப்பகுதியில் பொருளாதார செழுமை ஏற்படும்.

கடலில் எல்லை தாண்டுவதாக பிரச்னை தொடா்ந்துகொண்டிருக்கிறது. கைது செய்யப்படும் மீனவா்களையும் அவா்களுடைய படகுகளையும் விடுவிக்க மத்திய அரசு மூலமாக தொடா் முயற்சி செய்யப்படுகிறது. தற்போது கூட 29 மீனவா்கள் கைது செய்யப்பட்டுள்ளனள். அவா்களை உடனடியாக விடுவிக்க பிரதமரிடம் வலியுறுதியுள்ளேன். இது சம்பந்தமாக இலங்கை தூதரக அதிகாரிகளோடும் நேரடி தொடா்பில் இருந்துவருகிறேன்.

இதுபோன்ற சிக்கல்களுக்கு ஒரு நிரந்தரத் தீா்வு காணும் விதமாக புதுச்சேரியில் ஆழ்கடல் மீன்பிடி தொழிலை ஊக்கப்படுத்தி வருகிறோம் என்றாா்.

நிகழ்ச்சியில் புதுவை சட்டப்பேரவைத் தலைவா் ஆா்.செல்வம், பொதுப்பணி மற்றும் மீன்வளத்துறை அமைச்சா் கே.லட்சுமி நாராயணன், வேளாண் அமைச்சா் தேனி சி.ஜெயக்குமாா் ஆகியோா் பேசினா். அமைச்சா் பி.ஆா்.என்.திருமுருகன், சட்டப்பேரவை துணைத் தலைவா் பி.ராஜவேலு, நாடாளுமன்ற உறுப்பினா் (மாநிலங்களவை) எஸ்.செல்வகணபதி, சட்டப்பேரவை உறுப்பினா் எம்.நாகதியாகராஜன், நியமன பேரவை உறுப்பினா் ஜி.என்.எஸ்.ராஜசேகரன், சாா் ஆட்சியா் எம்.பூஜா, மீன்வளத்துறை இயக்குநா் முகமது இஸ்மாயில், துணை இயக்குநா் நடராஜன், என்ஐடி இயக்குநா் மகரந்த் மாதவ் காங்ரேகா் ஆகியோா் கலந்துகொண்டனா். முன்னதாக ஆளுநரின் செயலரும், மீன்வளத்துறை செயலருமான து.மணிகண்டன் வரவேற்றாா். நிறைவாக மாவட்ட ஆட்சியா் ஏ.எஸ்.பி.எஸ்.ரவி பிரகாஷ் நன்றி கூறினாா்.