பருவமழை : அதிகாரிகளுடன் துணைநிலை ஆளுநா் காணொலி மூலம் ஆலோசனை

வடகிழக்குப் பருவமழை முன்னெச்சரிக்கை நடவடிக்கைகள் தொடா்பாக, காரைக்கால் மாவட்ட அரசுத் துறை அதிகாரிகளுடன் துணைநிலை ஆளுநா் காணொலி மூலம் ஆலோசனை நடத்தினாா்.

புதுச்சேரி துணைநிலை ஆளுநா் கே. கைலாஷ்நாதன், புதுச்சேரியிலிருந்தவாறு காணொலி மூலம் காரைக்கால் அரசுத் துறை அதிகாரிகளுடன் வடகிழக்குப் பருவமழையையொட்டி பல்வேறு துறையினா் எடுத்திருக்கும் முன்னெச்சரிக்கை ஏற்பாடுகள், தயாா் நிலை குறித்து திங்கள்கிழமை ஆலோசனை நடத்தினாா்.

மாவட்ட சாா் ஆட்சியா் எம். பூஜா, முதுநிலைக் காவல் கண்காணிப்பாளா் வினய்குமாா் காட்கே மற்றும் துணை ஆட்சியா்கள் ஜி. செந்தில்நாதன், பாலு (எ) பக்கிரிசாமி உள்ளிட்ட பல்வேறு துறை அதிகாரிகள் கலந்துகொண்டனா்.

கூட்டத்தில், வடகிழக்குப் பருவமழையால் ஏற்படக்கூடிய பாதிப்புகளை எதிா்கொள்ள மாவட்ட நிா்வாகத்திடம் உள்ள பேரிடா் மேலாண்மை உபகரணங்கள், அவசரகாலப் பாதுகாப்பு ஏற்பாடுகள், தேவையான பணியாளா்களின் இருப்பு மற்றும் அனைத்துத் துறைகளும் மேற்கொள்ள வேண்டிய முன்னெச்சரிக்கை நடவடிக்கைகள் குறித்து ஆளுநா் கேட்டறிந்தாா்.

பருவமழைக் காலத்தில் பொதுமக்களின் பாதுகாப்பை உறுதி செய்ய அனைத்துத் துறையினரும் ஒருங்கிணைந்து செயல்பட வேண்டும். தேவையான உபகரணங்கள் மற்றும் மனிதவளத்தைத் தயாா் நிலையில் வைத்திருக்க வேண்டும். மழை மற்றும் வெள்ளத்தால் ஏற்படக்கூடிய பாதிப்புகளைத் தடுக்க உரிய முன்னெச்சரிக்கை நடவடிக்கைகளை உடனடியாக மேற்கொள்ளவேண்டும். பொதுமக்களிடமிருந்து வரும் புகாா்கள் மீது உடனுக்குடன் நடவடிக்கை எடுக்கவேண்டும் என ஆளுநா் அறிவுறுத்தினாா்.