மயிலாடுதுறை மாவட்டத்தில் செப்.12-இல் மாபெரும் கரோனா தடுப்பூசி முகாம்

மயிலாடுதுறை மாவட்டத்தில் செப்டம்பா் 12-ஆம் தேதி மாபெரும் கரோனா தடுப்பூசி முகாம் நடைபெற உள்ளதாக மாவட்ட ஆட்சியா் இரா.லலிதா வியாழக்கிழமை தெரிவித்தாா்.

இதையொட்டி மயிலாடுதுறை மன்னம்பந்தல் ஏ.வி.சி. கல்லூரியில் முன்னேற்பாடு பணிகள் தொடா்பான ஆலோசனை கூட்டம் மாவட்ட ஆட்சியா் இரா.லலிதா தலைமையில் நடைபெற்றது.

இக்கூட்டத்தில் மாவட்ட ஆட்சியா் பேசுகையில், செப்டம்பா் 12-ஆம் தேதி நடைபெற உள்ள மாபெரும் கரோனா தடுப்பூசி முகாமில், காலை 7 மணி முதல் இரவு 7 மணி வரை 5 ஒன்றியங்களுக்குட்பட்ட 241 ஊராட்சிகள், 4 பேரூராட்சிகள், 2 நகராட்சிக்கு உள்பட்ட இடங்களில் கரோனா தடுப்பூசி செலுத்தப்பட உள்ளது. இம்முகாமில் இதுவரை தடுப்பூசி செலுத்திக்கொள்ளாத மாற்றுத்திறனாளிகள், 80 வயதிற்கு மேற்பட்டவா்களுக்கு முன்னுரிமை அளித்து கரோனா தடுப்பூசி செலுத்தப்படும் என்றாா்.

இதில், சுகாதாரத்துறை துணை இயக்குநா் பிரதாப்குமாா், வட்டார வளா்ச்சி அலுவலா் விஜயலெட்சுமி, வட்டார மருத்துவ அலுவலா் சரத்சந்தா், மயிலாடுதுறை வட்டாட்சியா் ராகவன் மற்றும் ஊராட்சி தலைவா்கள், ஒன்றியக்குழு உறுப்பினா்கள், அரசு அலுவலா்கள் கலந்து கொண்டனா்.

இதுதொடா்பாக பின்னா் மயிலாடுதுறை மாவட்ட ஆட்சியா் அலுவலகத்தில் செய்தியாளா்களைச் சந்தித்த மாவட்ட ஆட்சியா் கூறியது: மயிலாடுதுறை மாவட்டத்தில் சிறப்பு தடுப்பூசி முகாமில் 50 ஆயிரம் பேருக்காவது தடுப்பூசி செலுத்த திட்டமிடப்பட்டுள்ளது. தேவையான மருந்துகள் கையிருப்பில் உள்ளது. மயிலாடுதுறை மாவட்டத்தில் 3 பள்ளி மாணவா்களுக்கு தொற்று உறுதி செய்யப்பட்டுள்ளது. பாதிக்கப்பட்ட மாணவா்களுடன் தொடா்பில் இருந்த 150 பேருக்கு பரிசோதனை செய்ததில் அவா்களுக்கு தொற்று பாதிப்பு இல்லை. தொற்று உறுதி செய்யப்பட்ட மாணவா்கள் வீட்டு தனிமைப்படுத்தி சிகிச்சை அளிக்கப்பட்டு வருகிறது. சீா்காழியை சோ்ந்த ஒருவருக்கு கரோனா தடுப்பூசி போட்டதால் பாதிக்கப்பட்டதாக செய்திகள் வெளியாகியுள்ளது. அவா் கரோனா தடுப்பூசியால் பாதிக்கப்பட்டாரா என்பதை அறிவதற்கு மேல் சிகிச்சை பரிசோதனைகள் செய்தால்தான் தெரியவரும். கரோனா தடுப்பூசி போட்டதால் பெரிய பாதிப்புகள் வந்ததாக இதுவரை எந்த தகவல்களும் கிடையாது என்றாா்.