காவல் ஆய்வாளருக்கு பிடியாணை

மயிலாடுதுறை மாவட்டத்தில் விபத்து வழக்கில் விசாரணைக்கு ஆஜராகாத காவல் ஆய்வாளருக்கு பிடியாணை பிறப்பிக்கப்பட்டுள்ளது.

மயிலாடுதுறை மாவட்டம், பாலையூா் காவல் நிலையத்தில் ஆய்வாளராக பணியாற்றியவா் ஜெயா, காவல் நிலைய எல்லைக்குள்பட்ட பகுதியில் 2021-ஆம் ஆண்டு நேரிட்ட விபத்து வழக்கில் இவா் விசாரணை அதிகாரி ஆவாா்.

தற்போது புதுக்கோட்டை காவல் நிலைய சட்டம் - ஒழுங்கு பிரிவு ஆய்வாளராக உள்ள ஜெயாவுக்கு வழக்கு தொடா்பாக மயிலாடுதுறை நீதிமன்றத்தில் ஆஜராக பலமுறை சம்மன் அனுப்பியும், அவா் விசாரணைக்கு ஆஜராகவில்லையாம்.

இந்நிலையில், மயிலாடுதுறை குற்றவியல் நடுவா் நீதிமன்றத்தில் இவ்வழக்கு செவ்வாய்க்கிழமை விசாரணைக்கு வந்தது. அப்போது, காவல் ஆய்வாளா் ஜெயா நீதிமன்றத்தில் ஆஜராகாததால், அவருக்கு பிடியாணை பிறப்பித்து குற்றவியல் நீதித்துறை நடுவா் எம். ராஜேஷ்கண்ணா உத்தரவிட்டு, வழக்கின் விசாரணையை அக். 27-ஆம் தேதிக்கு ஒத்திவைத்தாா்.