"தமிழகத்துக்கான காவிரி நீரை பெற்றுத் தர வேண்டும்

காவிரி மேலாண்மை குழு, ஒழுங்காற்று குழு ஆகியவற்றை அமைத்து தமிழகத்துக்கு உரிய காவிரி நீரை பெற்றுத் தர வேண்டும் என தமிழ்நாடு விவசாயிகள் சங்கம் வலியுறுத்தியுள்ளது.

நாகப்பட்டினத்துக்கு திங்கள்கிழமை வந்த அச்சங்கத்தின் பிரசார பேரியக்கத்தினர் வலியுறுத்திய கோரிக்கைகள்:

காவிரி மேலாண்மை குழு, ஒழுங்காற்றுக் குழுவை உடன் அமைக்க வேண்டும். காவிரியின் குறுக்கே கர்நாடகம் கட்டவுள்ள அணைகளை கைவிட செய்ய வேண்டும். காவிரியில் கழிவு நீர் கலப்பதை தடை செய்ய வேண்டும். தமிழக வறட்சி நிலையை நிரந்தரமாக போக்க தென்னக நதிகளை இணைக்க வேண்டும். பாசன வடிகால் கட்டமைப்புகளை மேம்படுத்தவும், நீர்நிலைகளில் உள்ள ஆக்ரமிப்புகளை அகற்றி தூர்வாரி நீர் கொள்ளளவை அதிகப்படுத்த வேண்டும். தேசிய விவசாயிகள் ஆணையத்தின் பரிந்துரைப்படி வேளாண் விளைபொருள்களுக்கு உற்பத்தி செலவுடன் 50 சதம் சேர்த்து விலையாக நிர்ணயம் செய்ய வேண்டும் உள்ளிட்ட கோரிக்கைகள் வலியுறுத்தப்பட்டன.

நாகை புதிய பேருந்துநிலையத்தில் நடைபெற்ற பிரசார பயண கூட்டத்தில் மாநிலத் துணைச் செயலர் பி.எஸ். மாசிலாமணி, மாவட்டச் செயலர் எஸ். சம்பந்தம் தலைமை வகித்தனர். இதில் முன்னாள் எம்எல்ஏ எம்.ஜி.கே. நிஜாமுதீன், சிபிஐ ஒன்றியச் செயலர் கோ. பாண்டியன் உள்ளிட்டோர் பங்கேற்றனர்.