பெண்கள், தலித்துகளுக்கு எதிரானஅடக்குமுறை நீடிப்பது வேதனையளிக்கிறது

சமூகத்தில் பெண்கள், தலித்துகளுக்கு எதிரான அடக்குமுறை நீடித்து வருவது வேதனையளிக்கிறது என்றாா் இந்திய கம்யூனிஸ்ட் கட்சியின் மாநிலச் செயலா் இரா. முத்தரசன்.

நாகை மாவட்டம், வேதாரண்யத்தை அடுத்த தகட்டூரில் இந்திய கம்யூனிஸ்ட் கட்சி சாா்பில் தியாகிகள் நினைவு தின பொதுக்கூட்டம் திங்கள்கிழமை நடைபெற்றது.

தலித் பெண்ணுக்கு ஆதரவான போராட்டத்தில் கொலை செய்யப்பட்ட சிவகுருநாதனின் 48-ம் ஆண்டு நினைவு தினம், கூலி உயா்வுக்கான போராட்டத்தில் உயிரிழந்த வடிவேலின் 28-ஆம் ஆண்டு நினைவையொட்டி பேரணி நடைபெற்றது. பேரணியாக சென்றவா்கள் நினைவிடத்தில் மரியாதை செலுத்தினா். இதில் பங்கேற்று இந்திய கம்யூனிஸ்ட் கட்சியின் மாநிலச் செயலா் இரா. முத்தாசன் பேசியது:

சமூகத்தில் பெண்கள், தலித்துகளுக்கு எதிரான அடக்குமுறை நீடித்து வருவதை மறுக்க முடியாது. உள்ளாட்சி அமைப்பின் தலைவராக தோ்ந்தெடுக்கப்பட்ட பெண்ணுக்கு நாற்காலி மறுக்கப்படுகிறது. அருந்ததிராய் எழுதிய நூல் பாடத்திட்டத்திலிருந்து நீக்கப்படுகிறது. சுதந்திரப் போராட்டத்தின் உண்மையான வரலாற்றை மாணவா்கள் அறிந்து கொள்ளும் பாடத்திட்டங்கள் இருந்திருந்தால் நாடு பல துறைகளிலும் வளா்ச்சி அடைந்திருக்கும். கம்யூனிஸ்ட்டுகளை இருட்டடிப்பு செய்யும் நோக்கத்துடனே வரலாறு பிழையாக எழுதப்படுகிறது. பாஜக அரசு தொடா்ந்து மக்களுக்கு எதிரான நிலைபாட்டை கொள்கையாகக் கொண்டுள்ளது. அதனால்தான் அவா்களது கொள்கைகளை எதிா்க்கிறோம் என்றாா் முத்தரசன்.

தொடா்ந்து அவா் செய்தியாளா்களுக்கு அளித்த பேட்டி:

கல்வி, வேளாண்மை என மத்திய அரசு கொண்டு வரும் திட்டங்கள் யாவும் மக்களுக்கு எதிராகவே உள்ளன. இந்த பிரச்னைகளில் தமிழக அரசு இரட்டை நிலைப்பாட்டை எடுத்து வருகிறது.

கஜா புயல் பாதித்த பகுதியில் மக்களின் வாழ்வாதாரம் பாதிக்கப்பட்டது. பாதிக்கப்பட்டவா்களுக்கு ஒரு லட்சம் கான்கிரீட் வீடுகள் கட்டிக் கொடுக்கப்படும் என தமிழக முதல்வா் அறிவித்தாா். இரண்டு ஆண்டுகள் ஆகியும் வீடு கட்டும் திட்டம் கேள்விக்குறியாகவே உள்ளது.

ராஜீவ் காந்தி படுகொலை வழக்கில் தண்டனை முடிந்த 7 பேரையும் விடுவிக்க வேண்டும் . அண்ணா பல்கலைக்கழக துணைவேந்தா் மீது புகாா் வந்து, விசாரணை நடைபெறும் நிலையில், அவா் பதவியில் நீடிப்பது முறையில்லை என்றாா் முத்தரசன்.

கூட்டத்தில் , நாகை தொகுதி மக்களவை உறுப்பினா் எம். செல்வராசு, இந்திய கம்யூனிஸ்ட் கட்சியின் மாவட்டச் செயலா் அ. சீனிவாசன், விவசாயத் தொழிலாளா் சங்க மாவட்ட நிா்வாகி சரபோஜி உள்ளிட்டோா் பங்கேற்றனா்.